ԵՐԵՎԱՆ, 31 մայիսի — Sputnik. «Սասնա ծռերի» գործով ամբաստանյալ Մանվել Աթոյանն ազատ արձակվեց։
Երևանի ընդհանուր իրավասության դատարանը բավարարեց Աթոյանի պաշտպան Արա Ղարագյոզյանի միջնորդությունը։
«Սասնա ծռերին» աջակցելու համար մեղադրվող Մանվել Աթոյանն ազատ արձակվեց 1 մլն գրավի դիմաց։
Նշենք, որ այսօր` մայիսի 31-ին, դատավոր Արտուշ Գաբրիելյանը բավարարել էր նաև ՊՊԾ գնդի գրավման գործով ամբաստանյալ Խաչատուր Գիչյանի պաշտպան Մարինե Ֆարմանյանի միջնորդությունը:
71-ամյա Գիչյանը կալանքից կազատվի, իսկ նրա հանդեպ որպես խափանման միջոց կընտրվի ստորագրությամբ երկրից չհեռանալը։
Գիչյանն այն «ԿռԱԶ»-ի սեփականատերն է, որով «Սասնա ծռերի» անդամները 2016 թվականի հուլիսին ներխուժել էին ՊՊԾ գունդ: Նա մեղադրվում է զինված խմբին օժանդակելու համար։
Հիշեցնենք, որ 2016թ-ի հուլիսի 17-ին վաղ առավոտյան «Սասնա ծռեր» խմբի անդամները բեռնատար ավտոմեքենայով ջարդել էին ոստիկանական ՊՊԾ գնդի մուտքի դարպասները, ներս մտել գնդի տարածք ու գրավել այն։ Խումբը պահանջում էր Սերժ Սարգսյանի հրաժարականն ու քաղբանտարկյալների ազատ արձակումը։ 14 օր տևած պաշարումից և մարդկային մի քանի կորուստներից հետո խմբի անդամները վայր դրեցին զենքն ու հանձնվեցին իրավապահներին։
