ԵՐԵՎԱՆ, 31 մայիսի — Sputnik. Բիզնեսով զբաղվող մարդիկ մարզպետներ չեն նշանակվի։ Այսօր ԱԺ-ում, լրագրողների հետ զրույցում հայտարարեց ՀՀ տարածքային կառավարման նախարար Սուրեն Պապիկյանը` անդրադառնալով Հայաստանի 4 մարզերում դեռևս չնշանակված մարզպետների հնարավոր թեկնածուների մասին շրջանառող տեղեկություններին։
«Առաջնորդվել ենք ըստ արժանիքների, հիմքում դրել ենք այդ մարդկանց այսօրվա Հայաստանի տեսլականի համապատասխանությունը, նրանց անցած քաղաքական ճանապարհը, կրթական և մյուս արժանիքները։ Մարզպետները չեն կարող ներկայացնել քրեաօլիգարխիան, չեն կարող զբաղվել բիզնեսով, օրենքով սահմանված կարգով պետք է իրենց պարտավորությունները կատարեն»,-շեշտեց Սուրեն Պապիկյանը։
Նախարարը չցանկացավ ժամանակից շուտ բացահայտել ապագա մարզպետների հնարավոր թեկնածուների անունները։
«Առաջիկա օրերին հայտնի կդառնան նաև այդ 4 մարզպետների անունները,- ասաց Պապիկյանը և հավելեց, — թող անակնկալ լինի»։
Պապիկյանը հայտարարեց նաև, որ նոր մարզպետները ընտրական շտաբի չգրանցված պետեր չեն լինելու և որևէ կուսակցության որևէ մարզում «որքան ուզի, այնքան չի խփելու»։
Հիշեցնենք` ՀՀ կառավարությունը վաղվա նիստի ընթացքում կհաստատի ՀՀ գործող մարզպետների հրաժարականները։ 10 մարզից 6-ում կնշանակվեն նոր մարզպետներ։
Հրապարակված նախագծերի համաձայն` Արարատի նոր մարզպետ կնշանակվի Նոր Կյանք գյուղի համայնքապետ Գարիկ Սարգսյանին, Կոտայքի մարզպետ` «Քաղաքացիական պայմանագրի» վարչության անդամ, ծնունդով Տավուշի Չինարի գյուղից Ռոմանոս Պետրոսյանը, Տավուշի մարզպետ` Իջևանի գործող քաղաքապետ Վահե Ղալումյանը, Շիրակի մարզպետ` «Քաղաքացիական պայմանագրի» անդամ Կարեն Սարուխանյանը, Գեղարքունիքի մարզպետ` 2017թ.-ի ընտրությունների ժամանակ Գեղարքունիքի մարզում ՀՅԴ ռեյտինգային թեկնածու Իշխան Սաղաթելյանը։
