ԵՐԵՎԱՆ, 30 մայիսի — Sputnik. ՀՀ կառավարությունը մտադիր է հարկային արտոնություն տրամադրել ԱԺ պատգամավոր Սամվել Ալեքսանյանի հետ փոխկապակցված «Ալեքս Տեքստիլ» ՍՊԸ–ին։
Էկոնոմիկայի նախարարության ներկայացրած նախագիծն ընդգրկված է կառավարության` հունիսի 1-ին նախանշված նիստի օրակարգում։
Նախագծի համաձայն` «Ալեքս Տեքստիլին» առաջարկվում է ազատել «գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումների, դրանց բաղկացուցիչ ու համալրող մասերի, հումքի և նյութերի ներմուծման մաքսատուրքից»։
Նախագծի հեղինակները վստահ են, որ արտոնությունը լուրջ խթան կհանդիսանա նոր ներդրումային ծրագրերի իրականացման և նոր աշխատատեղերի ստեղծման, տեղական արտադրության և արտահանման համար:
Նախագծից պարզ է դառնում նաև, որ ներմուծվող ապրանքը տրիկոտաժե գործվածքներ են Թուրքիայից և Ուզբեկստանից։
Նախագիծը կառավարության նիստի օրակարգում ներառված է զեկուցվող հարցերի շարքում, ինչը թույլ է տալիս ենթադրել, որ այն հաստատվելուց առաջ մանրամասն ներկայացման ու քննարկման կարժանանա։
