ԵՐԵՎԱՆ, 30 մայիսի — Sputnik. ՀՀ վարչապետ Նիկոլ Փաշինյանը Թբիլիսի կատարած պաշտոնական այցի շրջանակում այսօր հանդիպում ունեցավ նաև հայ համայնքի հետ ու շնորհակալություն հայտնեց ընդունելության և ջերմության համար։
«Այն հաղթանակը, որ ժողովուրդն արձանագրեց Երևանում, նաև ձերն է, և դուք լիարժեք կրողն եք այդ հաղթանակի, որովհետև դա տեղի է ունեցել ձե՛ր հայրենիքում, այդ հաղթանակի ընթացքում մենք զգացել ենք ձեր զորակցությունը, ձեր ասած յուրաքանչյուր բարի ցանկությունը հասել է Երևանի Հանրապետության հրապարակ»,- ասաց նա։
Փաշինյանը նշեց, որ Հայաստանում իրականացվեց սիրո և համերաշխության հեղափոխությունը։
«Այստեղ եմ եկել նույն ուղերձով։ Բոլորիդ սիրում եմ միասին և յուրաքանչյուրիդ առանձին»,- ասաց նա։
Հավաքվածները բուռն արձագանքեցին Փաշինյանի այս հայտարարությանը։
«Հպարտանում եմ ձեր կամքով ձեզանով, հպարտանում եմ` ձեր աչքերի մեջ տեսնելով հայ լինելու հպարտությունը։ Եվ հպարտանում եմ Հայաստանի և Վարաստանի հարաբերություններով` համոզված լինելով, որ մեր հարաբերություններն ավելի են խորանալու, վստահ եմ, որ հայերն իրենց ավելի լավ են զգալու Վրաստանում, իսկ վրացիները` Հայաստանում»,- ասաց նա։
Նրա խոսքով` սահմանները ոչ թե բաժանելու, այլ միացնելու են երկու ժողովուրդներին, որովհետև ամենաբարձր արժեքը, որ ունեն հայերն ու վրացիները, պետությունն է և ինքնիշխանությունը։
«Այսօր շատերը մաղթում են, որ հիասթափություններ չլինեն։ Չի լինելու, որովհետև մենք ծառայել, ծառայում և ծառայելու ենք հայ ժողովրդին։ Հայ ժողովուրդն այլևս երբեք չի պարտվելու»,- շեշտեց վարչապետը։
Նա իր ելույթն ավարտեց «կեցցեների» շարքով։
«Կեցցե ազատությունը, կեցցե Վրաստանի Հանրապետությունը, կեցցե հայ-վրացական եղբայրությունը, կեցցե Հայաստանի Հանրապետությունը, կեցցենք մենք և մեր երեխաները։ Մենք շարունակելու ենք ապրել, դառնալու ենք 5, 10 միլիոն և ապրելու ենք ազատ և երջանիկ Հայաստանում»,- եզրափակեց Փաշինյանը։
ՀՀ վարչապետի այցը մեկնարկել է մայիսի 30-ին։ Նա արդեն հասցրել է հանդիպել Վրաստանի փոխվարչապետ, արտգործնախարար Միխեիլ Ջանելիձեի, վարչապետ Գեորգի Կվիրիկաշվիլու, ինչպես նաև Վրաստանի նախագահ Գեորգի Մարգվելաշվիլու հետ։
Հայկական պատվիրակությանը «Շոթա Ռուսթավելի» միջազգային օդանավակայանում դիմավորել է Ջանելիձեն։
Հիշեցնենք, որ մայիսի 25-26-ին տեղի էր ունեցել ՀՀ նախագահ Արմեն Սարգսյանի առաջին աշխատանքային այցը Վրաստան։
