ԵՐԵՎԱՆ, 30 մայիսի — Sputnik. Եվրոպայի և ԱՄՆ-ի ներդրողները կուսումնասիրեն «Նաիրիտ» գործարանի տեխնիկական հնարավորությունները։ Այդ մասին այսօր խորհրդարանում լրագրողներին ասաց Հայաստանի էներգետիկ ենթակառուցվածքների և բնական պաշարների նախարար Արթուր Գրիգորյանը։
Այդ ներդրողները պատրաստ են գործարանում անձամբ կազմել տեխնիկական-տնտեսական նախահաշիվ` հասկանալու համար, թե ինչ գումարով կարելի է ոտքի կանգնեցնել գործարանը։
«Հիմա գործարանի ունեցվածքը վաճառում են սնանկության պատճառով, բայց պետությունը պայմանավորվել էր թեկուզ ժամանակավորապես դադարեցնել աճուրդը, մինչև ներդրողները գան։ Ես ինքս առայժմ չեմ զրուցել նրանց հետ, բայց շուտով քննարկումներ կանցկացնենք, կհայտնենք դրանց մասին», — ասաց նախարարը։
«Նաիրիտը»` խորհրդային շրջանի քիմիական հսկան, գործել է մինչև 2000-ականների վերջը և եղել է աշխարհում քլորոպրենային կաուչուկի խոշորագույն արտադրողներից մեկը։
