ԵՐԵՎԱՆ, 25 մայիսի — Sputnik. Իրանական գազը սահմանին 10 տոկոսով թանկ է, քան ռուսական գազը։ Այս մասին Մեծամորի ատոմակայանում կատարած շրջայցից հետո լրագրողների հետ ճեպազրույցում հայտարարեց Էներգետիկ ենթակառուցվածքների և բնական պաշարների նախարար Արթուր Գրիգորյանը` պատասխանելով այն հարցին, թե Երևանն իրանական գազը ռուսական գազի այլընտրանք դիտարկու՞մ է, թե ոչ։
Վերջին տվյալներով` իրանական գազն առաջարկվել է 1000 խմ դիմաց 165 դոլարով, իսկ ռուսական գազը Հայաստանը ստանում է 150 դոլարով։
«Ռուսական «Գազպրոմ» ընկերությունը տարեկան 27-28 մլն դոլարի ներդրումային ծրագրեր է իրականացնում, ինչն ավելի է էժանացնում ռուսական գազը իրանականի համեմատ», — ասաց Գրիգորյանը։
Նախարարը հրաժարվեց արձագանքել հարցին, թե ինչու է ռուսական գազը սահմանին 150 դոլար, իսկ բնակարաններում մարդիկ ավելի շատ են վճարում։ Նա ասաց, որ այս պահին ինքն այդ հարցի պատասխանը չունի։ Նախարարն առաջարկեց դիմել Հանրային ծառայությունները կարգավորող հանձնաժողով։ Հիշեցնենք, որ տնային տնտեսությունները գազը ստանում են 290 դոլարով, սոցիալապես անապահով խավը` 208 դոլարով։
Նշենք, որ Հայաստան-Իրան գազատարը շահագործման է հանձնվել 2007 թ-ին։ Գազատարով մատակարարվող իրանական գազը օգտագործվում է Երևանի ՋԷԿ-ի և քիչ ծավալներով Հրազդանի ՋԷԿ-ի 5-րդ էներգաբլոկի համար։ Արտադրված էլեկտրաէներգիայի մի մասը արտահանվում է Իրան, մյուս մասը մնում է Հայաստանում։ Գազատարի տարողունակությունն օգտագործվում է 20 տոկոսով։ Կողմերի միջև կա պայմանավորվածություն՝ Հայաստանը Իրանից ստացվող 1 խմ գազի դիմաց 3 կՎտ/ժ էլեկտրաէներգիա է մատակարարում։ Հայաստան մատակարարվող իրանական գազի ընդհանուր ծավալը տարեկան մոտ 400 միլիոն խորանարդ մետր է կազմում:
