ԵՐԵՎԱՆ, 24 մայիսի — Sputnik. «ԳեոՊրոՄայնինգ» ընկերություն հայտնում է, որ ստիպված է ժամանակավորապես դադարեցնել Սոթքի հանքում և ոսկու կորզման ֆաբրիկայում աշխատանքները։
Պատճառը, ըստ հաղորդագրության` մի խումբ մարդիկ են, ովքեր մայիսի 22-ից մինչև այսօր փակել են դեպի հանք ու Սոթք-Արարատ երկաթուղային ճյուղ տանող ճանապարհները։
«Ստեղծված իրավիճակում «ԳեոՊրոՄայնինգ գոլդ» ընկերությունը ստիպված է կանգնեցնել նաև արտադրությունը Արարատի ոսկու կորզման ֆաբրիկայում»,– ասված է ընկերության տարածած հաղորդագրության մեջ։
Ընկերության մամուլի խոսնակ Ռուզաննա Գրիգորյանը Sputnik Արմենիայի հետ զրույցում նշեց, որ ճանապարհները փակել են մարդիկ, ովքեր նախկինում ապօրինի մուտք են գործել հանքի տարածք ու ոսկու անօրինական արդյունահանում իրականացրել։
« Ընկերության բազմաթիվ դիմումները ՀՀ ոստիկանության վարչություն արդյունքներ չտվեցին։ Ոստիկանությունն իր անգործությունը բացատրում է նրանով, որ բողոքի ակցիաները խաղաղ բնույթ են կրում, և իրավապահ մարմինները իրավասու չեն տվյալ իրավիճակում որևէ բան ձեռնարկել»,– ասաց Գրիգորյանը` հավելելով, որ ընկերության աշխատակիցների թիվն այս պահին անցնում է 2000-ից։
Ոստիկանության լրատվական ծառայությունից Sputnik Արմենիային խոստացան պարզել իրողությունը։
Իսկ «Հարավկովկասյան երկաթուղու» մամուլի քարտուղար Վարդան Ալոյանը չբացառեց, որ ընկերության աշխատանքի դադարեցումը կարող է բացասաբար ազդել նաև իրենց աշխատանքի վրա, քանի որ ՀԿԵ–ի բեռնափոխադրումների 70%-ը կազմում են «ԳեոՊրոՄայնինգ գոլդ»–ի փոխադրումները։
