ԵՐԵՎԱՆ, 24 մայիսի — Sputnik. ՀՀ Քննչական կոմիտեն դիմում է ՀՀ Հատուկ քննչական ծառայությանը՝ առաջարկելով օրենքով սահմանված կարգով ընթացք տալ ՀՀ կառավարության շենքի մոտ քաղաքացու հնչեցրած այն հայտարարությանը, թե ՔԿ նախագահը կաշառք է պահանջել։ Այս մասին հայտնում է ՀՀ ՔԿ լրատվական ծառայությունը։
«Ակնկալում ենք, որ քաղաքացու հայտարարությունը կդառնա պատշաճ և օբյեկտիվ քննության առարկա, որի արդյունքները կներկայացվեն հանրությանը»,– նշված է հաղորդագրության մեջ։
Հիշեցնենք` հայտարարությունը հնչել էր այսօր՝ ՀՀ կառավարության նիստից առաջ, կառավարության շենքի մուտքի մոտ։ ՔԿ նախագահի տեղակալ Արթուր Ղամբարյանի ճեպազրույցի ընթացքում լրագրողներին էր մոտեցել Արմեն Խալոյան ներկայացած քաղաքացին ու հայտարարել, որ իր բնակարանն ապօրինաբար խլել են իրենից, ու գործը բացահայտելու համար ՀՀ քննչական կոմիտեի նախագահ Աղվան Հովսեփյանն իրենից գումար է պահանջել։
