ԵՐԵՎԱՆ, 23 մայիսի — Sputnik. Նոր կառավարությանը պետք է դրսևորվելու հնարավորություն տալ: Այդ մասին լրագրողների հետ զրույցում ասաց ՀՀԿ խմբակցության պատգամավոր Սեդրակ (Սեյրան) Սարոյանը:
«Եթե արած ըլնեմ, թող դատեն: Ես տե՞նց պաշտոնի եղել եմ, որ գողնամ: Մեզ ո՞վ ա էդ կաստրյուլկին թողել մոտենանք, որ բան գողնանք: Այ մարդ, ես ի՞նչ գործ ունեմ: Էսօր խոստացել ա, որ պիտի ասի, մթոմ ես շատ գիտե՞մ: Ես էլ կլսեմ ձեր հետ»,- ասաց նա:
Սարոյանի խոսքով` եթե նոր իշխանությունը դիմանա կաշառքի գայթակղությանը, պետք է նրանց ողջունել` որ կուսակցությունից էլ լինեն։
«Եթե նամուս ունենան, թասիբ ունենան, չեն անի տենց բան: Էդ մարդկանց անձամբ չեմ ճանաչում: Կարող ա տենց պրինցիպիալնի տղա ա, որ չանի: Եթե չանի, ես նրա ցավը տանեմ:Կարող ա իմ փոխարեն էլ մի հատ ջահել տղա գա, ասեմ`դու գնա վարի իմ փոխարեն: Ինձ իմ պետությունն ա հետաքրքիր, որ հզոր ըլնի: Միշտ էլ հանրապետական ֆրակցիայում եմ եղել: Բայց տեսել եք՝ հենց ժողովրդի դեմ մի բան են խոսացել, հելել կռվել եմ», — ասաց Սարոյանը:
Իսկ այդ դեպքում ո՞րն է տարբերությունը`լինի Փաշինյանը, թե Սարգսյանը: Այս հարցին Սարոյանը պատասխանեց. «Էն ա տարբերությունը, որ Սերժ Սարգսյանի փորձը շատ մեծ ա: Եվ մենք հետագայում կզգանք էտի», — ասաց Սարոյանը:
Վատն այն է, որ հայ հասարակությունը դժգոհ է ցանկացած ղեկավարից, կարծում է նա:
«Մեր ազգի վատը ի՞նչն ա՝ որ իրար վրա ցեխ շփենք, մնդռենք: Խի՞ թագավոր չենք ունեցե… Խի՞ հազար տարի պետականություն չենք ունեցե… Որտև էս ազգը ղեկավար չի՛ սի-րո՛ւմ… Էսա կսկսեն, դու տես` խեղճ Նիկոլին ինչ օրը կքցեն… Ահաաա՜… Հլա համբերա: Հմա արդեն սկսել եք, ուզում եք, որ վատ բառեր ասեմ Նիկոլի մասին: Չեմ ասի, ձեր ինադու», — ժպիտով եզրափակեց Սարոյանը:
Հիշեցնենք` ԱԱԾ նորանշանակ ղեկավար Արթուր Վանեցյանը հայտարարել է, որ շուտով կբացահայտվեն կոռուպցիոն սխեմաներով հարստացած մարդկանց անուններ: Վանեցյանը նշել էր, որ այդ մարդիկ հարստացել են պետությունից գողություն անելով: ԱԱԾ ղեկավարի խոսքով, Հայաստանում 350 մարդ կա, որոնց անունով բիզնեսներ են բացված, սակայն նրանք հարկեր չեն մուծում, քանի որ նրանց անձնագրերը վերցրել ու բիզնես են բացել:
Վանեցյանը խոստացել է, որ մայիսի 23-ից կլինեն բացահայտումներ, և Հայաստանում կարող են հայտնվել 350 նոր միլիոնատերներ:
