ԵՐԵՎԱՆ, 23 մայիսի — Sputnik. Քաղբանտարկյալներին ազատ արձակելու գործընթացը սկսվել է ու կշարունակվի, այսօր լրագրողների հետ զրույցում ասաց ՀՀ վարչապետ Նիկոլ Փաշինյանը՝ պատասխանելով լրագրողների` Ժիրայր Սեֆիլյանի բաց նամակի մասին հարցին։
«Չի կարելի բռնության սպառնալիքներով, բռնության սպառնալիքների ակնարկներով խոսել ժողովրդի հետ, և հույս ունեմ, որ բոլորս հականում ենք՝ եթե արձանագրվել է քաղաքական իրադրության փոփոխություն, այդ քաղաքական իրադրության փոփոխությունը պետք է արձանագրվի բոլորի պահվածքում, որ մենք կարողանանք սիրո և համերաշխության հեղափոխության տրամաբանությունը շարունակել մինչև վերջ»,-ասաց Փաշինյանը:
Սեֆիլյանն իր նամակում նշել էր, որ եթե քաղբանտարկյալները ազատ չարձակվեն, դա հղի է վտանգավոր հետևանքներով։ «Սասնա ծռերն» էլ նամակ էին գրել վարչապետին և նշել, թե նա ձեռքերը լվացել է իրենց գործից։
ՀՀ վարչապետն այս հայտարարությանն ի պատասխան ասաց, որ չի պատրաստվում դատավորներին հրահանգ տալ։
«Ես հաստատում եմ իմ դիրքորոշումը, որովհետև որևէ նպատակով դատավորներին հրահանգ տալու գործընթաց սկսելը նշանակում է սկսել սերժսարգսյանացման գործընթաց։ Ես այդպիսի գործընթացի մեջ ինքս ինձ չեմ դնի, որովհետև հակառակ դեպքում եթե մենք դատարանին մեկ անգամ հրահանգ տանք, դատարանը այլևս երբեք առանց մեր հրահանգի չի աշխատի»:
Նրա խոսքով` որպեսզի դատավորներին իշխանական կաբինետներից և որևէ տեղից ապօրինի հրահանգներ չստանան, որևէ դատավոր կաշառքով դատավճիռ չկայացնի, դատավորները պետք է գործեն օրենքով իրենց վերապահված իրավասությունների և օրենքների շրջանակում:
