ԵՐԵՎԱՆ, 23 մայիսի — Sputnik. Միխեիլ Սաակաշվիլու «Ուժերի զարթոնք» գրքի թարգմանիչ Միքայել Նահապետյանն ընդունել է փոխվարչապետ Տիգրան Ավինյանի առաջարկը և ծառայության անցել ՀՀ կառավարությունում` փոխվարչապետի գրասենյակում: Այս մասին Նահապետյանը հայտնել է Facebook սոցիալական ցանցի իր էջում։
Նրա խոսքով` քաղաքացու պայքարը, որ հաղթանակեց փողոցում, պետք է վերածվի սոցիալական նոր պայմանադրության, ստեղծի հանրային հարաբերությունների նոր ձևեր, պետական շինարարության նոր մոտեցումներ:
«Եվ այս առումով է պատմական շարժման օրակարգը` ազատ ընտրությունների, իրապես քաղաքական կուսակցությունների և ոչ օլիգարխիական պետապարատի պահանջմունքներով»,- գրել է նա:
Նահապետյանը նշել է, որ իրենց վստահված բլոկում (որտեղ և տնտեսական քաղաքականության հարցերն են) պիտի գտնվի այն պայմանադրության իրավական ձևը, որն ընդունելի կլինի թե՛ այս հաղթանակի տեր քաղաքացու համար, թե՛ պետական կառավարումը թողնելու ու բիզնեսով զբաղվելու պատրաստ օլիգարխների համար:
«Ահա այս մոտեցումների կառավարության կողմից ըմբռնումն է, որ ինձ բարձրագույն իշխանության և զորության կրող քաղաքացու դիրքից որոշ ժամանակով ուղարկեց դեպի ծառայողի դիրքը: Եվ այս պատշգամբից ամեն անգամ նայելով զորության կրողին նորից եմ համոզվում, որ չհաջողելու գինը սերունդների երջանկությունն է, չհաջողելու գինը արյունահեղությունն է: Ուստի այս օրակարգը մեր առաքելությունն է, մեզ ուղղված պատվերը որպես քաղաքացիներ` անկախ զբաղեցրած պաշտոնական դիրքից»,- գրել է նա:
Նշենք, որ Միքայել Նահապետյանը Միխեիլ Սաակաշվիլու «Ուժերի զարթոնք» գրքի թարգմանիչն է։
