ԵՐԵՎԱՆ, 23 մայիսի — Sputnik. Պետք է բարձրացնել բժիշկների վարձատրությունը և այդ ժամանակ նոր բացառել «ատկատը»։ Այս մասին այսօր խորհրդարանում հարցուպատասխանի ժամանակ ասաց ՀՀ առողջապահության նորանշանակ նախարար Արսեն Թորոսյանը` պատասխանելով «Դաշնակցություն» խմբակցության քարտուղար Արմենուհի Կյուրեղյանի հարցին։
Թորոսյանը խոսեց հիվանդներին կրկնակի հետազոտությունների ուղարկելու մասին։
«Երևույթն անօրինական է: Խնդիրը նաև բուժաշխատողների դաշտում է, նրանք ակնկալում են հավելյալ գումարներ, որովհետև հիմնական աշխատավարձը ցածր է: Լուծումները պետք է այդ դաշտում տեսնենք՝ բարձրացնելով աշխատավարձերը։ Հետո նոր պետք է ավելի պահանջկոտ լինենք նման խախտումների նկատմամբ»,- ասաց Թորոսյանը:
Հնարավոր է` բյուջեից հատկացվող սուբսիդիաները գործն առաջ տանեն։ Թորոսյանը հավելեց, որ պետք է քննարկել` ինչ սկզբունքով հավելավճար տրամադրել բարեխիղճ բժիշկներին ու ինչպես որոշել այդ բարեխղճությունը։
