ԵՐԵՎԱՆ, 23 մայիսի — Sputnik. Նախորդ տարի Հայաստանում հանցավորությունն աճել է 8,1 տոկոսով։ Այս մասին այսօր ԱԺ-ում հայտարարեց գլխավոր դատախազ Արթուր Դավթյանը՝ ներկայացնելով ՀՀ դատախազության 2017թ. գործունեությունը:
«2017թ.–ին Հայաստանում արձանագրվել է 20,285 դեպք, 2016թ.–ին դրանք 18,764-ն էին: Այսինքն՝ հանցավորությունն աճել է 8,1 տոկոսով, ինչը պայմանավորված է լատենտայնության աստիճանով»,–նշեց ՀՀ գլխավոր դատախազը:
Արթուր Դավթյանի խոսքով՝ հանցագործությունների թվի գործակցով 100,000 բնակչի հաշվով Հայաստանն ակնհայտ շահեկան դիրքերում է բազմաթիվ այլ պետությունների, այդ թվում՝ Ռուսաստանի, Բելառուսի, Մոլդովայի համեմատ:
Ընդ որում` առանձնապես ծանր հանցագործության դեպքերը 2017–ին նվազել են 16,7 տոկոսով, իսկ ծանր հանցագործությունների դեպքերը՝ 11,4 տոկոսով:
«2017թ. 25,8 տոկոսով նվազել են սպանության դեպքերը, 100,000 բնակչի հաշվարկով սպանությունների թիվը 1,6 է կազմել, իսկ աշխարհում՝ 6,9, ԱՄՆ-ում՝ 4,8, Եվրոպայում՝ 1,5:
Նվազել են սպանության փորձերը, ավազակության, բնակարանային գողությունների դեպքերը: Նշված հանցագործությունների դեմ պայքարը, դրանց կանխումը, բացահայտումը դատախազության աշխատանքում առաջնահերթություն են»,- ավելացրեց գլխավոր դատախազը:
Հանցագործությունների բացահայտման ցուցանիշները ևս աճել են: Դատախազն ասաց, որ 2016թ. 78,5 տոկոս էր, իսկ 2017թ.՝ 83,3 տոկոս:
