ԵՐԵՎԱՆ, 23 մայիսի — Sputnik, Լաուրա Սարգսյան. Իսրայելում Քնեսեթի կողմից Հայոց ցեղասպանության ճանաչման համար բարենպաստ մթնոլորտ է ստեղծվել։ Այս մասին է վկայում այն փաստը, որ այսօր խորհրդարանում քննարկվել է այդ հարցը, կարծում է «Իսրայել-Հայաստան» միջազգային հասարակական ֆորումի համանախագահ Ալեքսանդր Ցինկերը։
Այսօր Իսրայելի խորհրդարանը քննարկել է Հայոց ցեղասպանության ճանաչման հարցը։ Դեբատների նախաձեռնողը Քնեսեթում «Մերեց» կուսակցությունը ներկայացնող Թամար Զանդբերգն է։
Պատգամավորները հետևյալ կերպ են քվեարկել` 16 «կողմ» ու 0 «դեմ» և դրանով հավանություն են տվել Հայոց ցեղասպանության հարցը պաշտոնապես օրակարգ մտցնելու Զանդբերգի առաջարկին։
Քննարկման ընթացքում Քնեսեթի խոսնակ Յուլի Էդելշտեյնը նշել է, որ պետք է ճանաչել Հայոց ցեղասպանությունն ու խստորեն արտահայտվել այդ թեման շահարկող քաղաքական գործիչների մասին։
«Պատգամավոր Զանբերգի ու խորհրդարանի խոսնակի առաջարկությամբ Հայոց ցեղասպանության հարցը պլենար նիստ կմտնի։ Նիստի օրը պետք է որոշեն Յուլի Էդելշտեյնն ու խմբակցությունների առաջնորդները։ Հնարավոր է` դա տեղի ունենա առաջիկա շաբաթների ընթացքում», – ասաց Ցինկերը
Նրա խոսքով` եթե Էդելշտեյնը ուղղակիորեն խոսում է այն մասին, որ աջակցում է Հայոց ցեսասպանության ճանաչման հարցին, կարելի է ենթադրել, որ նա կաշխատի պլենար նիստում քննարկումից առաջ այնպես անել, որ Քնեսեթի պատգամավորների մեծ մասը աջակցեն առաջարկին։
«Ակնհայտ է, որ Հայոց ցեղասպանության ճանաչման հարցում առաջխաղացում կա։ Ուզում եմ նշել, որ Էդելշտեյնը Քնեսեթի այսօրվա ելույթով վերացրեց այդ թեմայի շահարկման շղարշը», – ասաց Ցինկերը։
Հիշեցնենք` նախորդ շաբաթ պատգամավոր Իցիկ Շմուլին («Սիոնական ճամբար») քննարկման է դրել Հայոց ցեղասպանության ճանաչման մասին օրինագիծը։ Հայտնի է, որ նման օրինագիծ էր պատրաստվում ներկայացնել Քնեսեթի պատգամավոր Ամիր Օհանան («Լիկուդ»)։ Հայ ժողովրդի ողբերգությունը ճանաչելու կոչ է արել նաև «Հրեական տուն» կուսակցության առաջնորդ, Իսրայելի կրթության նախարար Նաֆտալի Բենետն ու Իսրայելի տրանսպորտի և հետախուզության նախարար Իսրայել Կացը։
