ԵՐԵՎԱՆ, 22 մայիսի — Sputnik. Նոր կառավարությանը բաժին է ընկել մաքրել «ավգյան ախոռները», որոնք մնացել են երեք նախագահների կառավարման արդյունքում։ Այս մասին Sputnik Արմենիա մամուլի կենտրոնում կայացած ասուլիսի ժամանակ ասաց Հայաստանի Դեմոկրատական կուսակցության առաջնորդ Արամ Սարգսյանը։
Այդ «ավգյան ախոռները» հսկայական պետական պարտքն է, տնտեսական խնդիրները, տնտեսությունում ստվերային շրջանառության հսկայական չափաբաժինը, արտագաղթը։ Սարգսյանը կարծում է, որ նոր կառավարության համար ամենակարևոր խնդիրներից է երկրի պետական պարտքի դիվերսիֆիկացիան։
«Մեր հետազոտությունները ցույց են տվել, որ պետական պարտքի յոթ միլիոն դոլարից ոչ մի դոլար տնտեսության զարգացման վրա չի ծախսվել։ Հետևաբար, նոր կառավարությունը պետք է գույքագրում անցկացնի, հասկանա` ինչ ունենք այսօր», – ասաց քաղաքական գործիչը։
Նիկոլ Փաշինյանի խնդիրներից պետք է լինի նաև երեք նախագահների` Լևոն Տեր–Պետրոսյանի, Ռոբերտ Քոչարյանի ու Սերժ Սարգսյանի կառավարման ադեկվատ քաղաքական ու իրավական գնահատական տալը։ Սարգսյանը վստահ է, որ միայն այդ մարդկանց գործունեության հստակ գնահատականը թույլ կտա խուսափել սխալների կրկնությունից։
Նրա խոսքով` առանձին ուժերի ձեռքում շարունակում են մնալ հսկայական կապիտալներ ու պաշարներ, ինչը կարող է դրդել նրանց վրեժխնդրության գնալ։ Անդրադառնալով Ազգային անվտանգության ծառայության տնօրենի հայտարարությանը` կապված տարիներով գործող կոռուպցիոն սխեմաները բացահայտելու մտադրության հետ, Սարգսյանն ասաց` տարօրինակ է, որ հատուկ ծառայության ղեկավարը սկզբում ասում է` հետո անում։
«Մարդ պետք է լուռ անի իր աշխատանքը ու առավել ևս չհայտնի ինչ-որ ժամկետների մասին, որի սահմաններում պետք է գործողություններ ձեռնարկվեն», – ասաց Սարգսյանը։
Հիշեցնենք` Հայաստանի Ազգային անվտանգության ծառայության տնօրեն Արթուր Վանեցյանն ասել էր, որ մտադիր է ապօրինի հարստացման ու կոռուպցիայի դեմ պայքար սկսել։ Գերատեսչության ղեկավարը նշել էր, որ այդ ուղղությամբ քայլեր կձեռնարկվեն մայիսի 23–ից հետո։ Նրա խոսքով` մոտ 350 մարդ չգիտի, որ խոշոր բիզնեսով է զբաղվում ու հարկ չի վճարում։
