ԵՐԵՎԱՆ, 21 մայիսի — Sputnik. Ճանապարհային երթևեկության կանոնների խախտման տուգանքների համաներման ու տեսախցիկների աշխատանքը դադարեցնելու մասին վերջնական որոշում կառավարությունը կկայացնի առաջիկայում։ Այս մասին այսօր լրագրողների հետ զրույցում ասաց վարչապետ Նիկոլ Փաշինյանը։
«Ինձ համար միանշանակ է, որ տուգանքների գնային համակարգն ու նշանակման կարգը պետք է փոխվի, որովհետև մեր քաղաքացիները հայտնվել են մի վիճակում, երբ առավոտյան արթնանում են տուգանվելու համար։ Ընդհանրապես մենք բոլորս ապրում ենք տուգանվելու համար»,- ասաց Փաշինյանը` հավելելով, որ այս միտումը պետք է փոխվի։
Վարչապետը չթաքցրեց, որ ինքը ևս ժամանակին ապրել է կյանքի այդ ռիթմով, ու թեև շատ չի տուգանվել, բայց ամեն անգամ տուգանքի ծանուցում ստանալուց հետո անարդարության զգացում է ունեցել։
Իսկ համաներման Փաշինյանն անձամբ չի սպասում, քանի որ բոլոր տուգանքները ժամանակին վճարել է։ Եթե նույնիսկ կան չվճարվածներ, խոստանում է վճարել։
Ինչ վերաբերում է տեսախցիկների աշխատանքի ժամանակավոր դադարեցմանը, Նիկոլ Փաշինյանը նշեց, որ այդ հարցը կքննարկվի միայն վերջին մեկ շաբաթվա խախտումների վիճակագրության ուսումնասիրությունից հետո։
«Եթե կլինեն վատթարացման միտումներ, կանենք եզրակացություններ,- ասաց Փաշինյանը` հիշեցնելով,- ես առաջարկել եմ դիտարկել հնարավորությունը` ի՞նչ կարելի է անել, այդ թվում` հնարավո՞ր է դադարեցնել։ Եթե միայն այս հայտարարությունը վատ հետևանքներ է ունեցել, ապա համապատասխան եզրակացություններ կարվեն»։
Հիշեցնենք` կառավարության վերջին նիստում Փաշինյանը պատկան կառույցներին առաջարկել էր քննարկել տեսանկարահանող սարքերի աշխատանքը ժամանակավորապես դադարեցնելու հնարավորությունը։ Վարչապետի հայտարարությունը թյուրըմբռնման առիթ էր դարձել հանրության շրջանում։ Որոշ վարորդներ, կարծելով, որ դրանք արդեն չեն գործում, սկսել էին ավտոմեքենա վարել խախտումներով ու արագության գերազանցմամբ։
