ԵՐԵՎԱՆ, 20 մայիսի — Sputnik. Մայիսի 16-ին «Գանձասար-Կապանին» Հայաստանի գավաթի խաղարկության եզրափակիչում 11 մետրանոց հարվածաշարով պարտվելուց հետո, «Ալաշկերտը» ռևանշի հասավ առաջնության վերջին տուրում: Արտակ Դաշյանի և Արտակ Եդիգարյանի խփած գնդակները գավաթն անհասանելի դարձրեցին «Ալաշկերտին» հակառակորդների համար: Վերջին տուրում «Ալաշկերտը», հաղթանակի հասնելով «Գանձասար-Կապանի» նկատմամբ 2:0 հաշվով, երրորդ անգամ անընդմեջ նվաճեց Հայաստանի չեմպիոնի կոչումը:
Անկասկած, «Ալաշկերտը» Հայաստանի վերջին տարիների լավագույն ակումբներից մեկն է: Իզուր չէ, որ թիմը նախորդ երկու առաջնություններում նույնպես դարձել էր լավագույնը: Սակայն այս մրցաշրջանում «Ալաշկերտին» չեմպիոնական մրցավազքում հաղթելու գործում «օգնեց» հիմնական մրցակից «Շիրակը»: Առաջնության ավարտից մի քանի տուր առաջ գյումրեցիները միավորների առավելություն ունեին «Ալաշկերտի» նկատմամբ ու ավելի լավ շանսեր` չեմպիոն դառնալու համար: Սակայն «Բանանցի» հետ պայմանավորված խաղ անցկացնելու փորձի պատճառով «Շիրակը» զրկվեց 12 միավորից ու նույնիսկ մրցանակային եռյակում իր տեղից:
Առաջնության վերջին տուրում «Ալաշկերտի» հաղթանակը «Գանձասար-Կապանի» նկատմամբ, մրցաշարային աղյուսակում առաջ քայլ կատարելու շատ լավ հնարավորություն տվեց «Բանանցին»: Այդ շանսը «Բանանցն» օգտագործեց ու, հաղթելով «Արարատին» 2:0 հաշվով, աղյուսակում շրջանցեց «Գանձասար —Կապանին» և մրցաշարն ավարտեց երկրորդ տեղում, իսկ Հայաստանի գավաթակիր «Գանձասար-Կապանը» եզրափակեց մրցանակային եռյակը:
Առաջնության վերջին տուրում «Շիրակը»` ի նշան բողոքի, խաղադաշտ դուրս չեկավ «Փյունիկի» հետ խաղում և գրանցեց տեխնիկական պարտություն` 0:3 հաշվով:
Պարզ դարձավ, որ Չեմպիոնների լիգայի հաջորդ խաղարկությունում Հայաստանը ներկայացնելու է «Ալաշկերտը»: «Բանանցն» ու «Գանձասար-Կապանը» հանդես կգան Եվրոպայի լիգայի խաղարկությունում: Ըստ զբաղեցրած տեղի(«Շիրակը» չորրորդն է աղյուսակում)` գյումրեցիները նույնպես կարող են հանդես գալ Եվրոպայի լիգայի խաղարկությունում: Բայց կա մեկ խոչընդոտ: ՈւԵՖԱ-ն վարույթ է սկսել «Շիրակի» նկատմամբ` կապված «Բանանցի» հետ պայմանավորված խաղ անցկացնելու փորձով: Չի բացառվում, որ թիմը կարող է որակազրկվել: Կարճ ժամանակահատվածում ամեն ինչ պարզ կդառնա:
