ԵՐԵՎԱՆ, 19 մայիսի — Sputnik. Թուրքիայի քրդական «Ժողովուրդների դեմոկրատական» (HDP) կուսակցության փոխնախագահ Կարո Փայլանը թուրքական հեռուստաալիքներից մեկի եթերում դատավորներին կոչ է արել շտապ ազատ արձակել նախագահի թեկնածու Սելահաթին Դեմիրթաշին։
Փայլանը հայտարարել է, որ հենց Էրդողանի հրահանգով է HDP-ի նախագահի թեկնածու Սելահաթին Դեմիրթաշը կալանավորվել և նրա հրահանգով էլ կարող է ազատ արձակվել։
«Ամեն ինչ շրջվում է։ Էրդողանը գնալու է։ Ձեր որոշումների պատճառով դուք կարող եք դատվել հունիսի 24-ի ընտրություններից հետո։ Իրավունքով ու արդարությամբ դատավարությունն իրականացրեք»,-ասել է Կարո Փայլանը դատավորներին։
Թուրքիայի նախագահի թեկնածու Սելահաթին Դեմիրթաշը, որը 2016 թվականի նոյեմբերից անազատության մեջ է, ավելի վաղ հայտարարել է, որ ընտրություններում հաղթելու դեպքում կբացի հայ-թուրքական սահմանը։
16 մայիսի 2018, 11:59
Կարո Փայլանը Էրդողանի ռեժիմի հետևողական քննադատողներից մեկն է, այդ թվում նաև` Օսմանյան կայսրությունում իրականացրած Հայոց ցեղասպանության ճանաչման հարցում։ 2016 թվականի ապրիլին խորհրդարանի նիստերից մեկի ժամանակ Փայլանը հանդես եկավ նախաձեռնությամբ` պահանջելով խորհրդարանական հանձնաժողով ձևավորել և հետաքննել 7 հայ պատգամավորներին Օսմանյան կայսրության տարիներին ձերբակալելու և սպանելու մասին գործը։ 1908-1915 թվականներին 6 հայ պատգամավոր է սպանվել` Գրիգոր Զոհրապ, Պետրոս Հալաջյան, Նազարեթ Տաղավարյան, Կարապետ Փաշայան, Հովհաննես Սերենկյուլյան, Օնիկ Դերձակյան, Համբարձում Բոյաջյան։ Նրանց անունները կարդալով` Փայլանը հայերենով ասաց «Աստված հոգիները լուսավորի»։ Հայ պատգամավորը նաև բազմիցս կոչ է արել երկրի իշխանությանը ընդունել սեփական պատմությունը և ճանաչել հայ ժողովրդի Ցեղասպանության փաստը։
