ԵՐԵՎԱՆ, 18 մայիսի — Sputnik. Հայաստանը ղարաբաղյան հակամարտության կողմ է, քանի որ Ադրբեջանը զավթել է Հայաստանի տարածքները և արգելափակում է երկրի կոմունիկացիաները, Sputnik Արմենիային ասաց պաշտպանության նախկին նախարար Վաղարշակ Հարությունյանը։
«Հակամարտություն ասելով հասկանում ենք զինված դիմակայություն, Հայաստանն Ադրբեջանի հետ հենց այդպիսի իրավիճակում է։ Հայաստանը կորցրել է իր տարածքը` Արծվաշենը, Ադրբեջանը փակում է մեր կոմունիկացիաները։ Ըստ էության, Հայաստանը հակամարտության կողմ է», — ասաց Հարությունյանը։
Մյուս կողմից` արդեն խոսվել է, որ Հայաստանը համապատասխան փաստաթղթերում հակամարտության կողմ է նշվում։
Կարևոր հանգամանք ևս` հրադադարի մասին եռակողմ համաձայնագիրը նույնպես Հայաստանն է ստորագրվել։
Հիշեցնենք, որ Նիկոլ Փաշինյանը Ստեփանակերտում ելույթ ունենալիս հայտարարեց, որ Հայաստանը ղարաբաղյան հակամարտության կողմ է։ Պաշտպանության նախկին նախարար Վիգեն Սարգսյանը պատասխանեց, որ նման հայտարարությունը «կարող է վտանգավոր լինել»։
Դրան հետևեց ՀՀ առաջին նախագահ Լևոն Տեր-Պետրոսյանի հայտարարությունը, որում նա աջակցում էր Փաշինյանին։
1992-1996 թվականներին ԵԱՀԿ ՄԽ համանախագահ Վլադիմիր Կազիմիրովը Sputnik Արմենիայի հետ զրույցում հաստատեց Տեր-Պետրոսյանի դիրքորոշումը։
ՀՀ փոխարտգործնախարար Շավարշ Քոչարյանն էլ երեկ հայտարարեց, որ Հայաստանը հակամարտության մեջ ներքաշված կողմ է։
