ԵՐԵՎԱՆ, 18 մայիսի — Sputnik. Խաբեության եղանակով զինվորական ծառայության պարտականությունները ժամանակավորապես դադարեցնելուն օժանդակելու և կաշառք ստանալու կասկածանքով ձերբակալվել է ՊԲ N զորամասի շտաբի օպերատիվ բաժնի կառավարման կետերի բաժանմունքի օպերատիվ հերթապահ մայոր:
Այս մասին տեղեկացնում է ՀՀ դատախազության մամուլի ծառայությունը։
ՀՀ ՊՆ ՌՈ աշխատակիցների կողմից իրականացված օպերատիվ միջոցառումների արդյունքում ՊԲ N զորամասի մի խումբ պարտադիր ժամկետային զինծառայողներ բացատրություններ են տվել այն մասին, որ 2017թ. հոկտեմբերից մինչև 2018թ. ապրիլ ամիսն ընկած ժամանակահատվածում ինչպես անձամբ, այնպես էլ միջնորդների միջոցով գումարներ են փոխանցել ՊԲ-ում ծառայող անձի: Վերջինս դրա դիմաց մտացածին հեռախոսագրեր է հասցեագրել ՊԲ N զորամաս, որոնք հիմք են հանդիսացել իրենց արձակուրդ տրամադրելու համար:
Նշված պաշտոնատար անձը՝ զորամասի շտաբի օպերատիվ բաժնի կառավարման կետերի բաժանմունքի օպերատիվ հերթապահ մայոր Դ.Ղ.-ն, իր բացատրությամբ ևս ընդունել է մի շարք զինծառայողներից գումարներ վերցնելու և դրա դիմաց նրանց ծառայության զորամասին կեղծ հեռախոսագրեր հասցեագրելու հանգամանքը:
Մայիսի 5-ին ՀՀ ՔԿ ԶՔԳՎ առաջին կայազորային քննչական բաժնում հարուցվել է քրեական գործ:
Նախաքննության ընթացքում իրականացված օպերատիվ-հետախուզական, քննչական և այլ դատավարական գործողությունների արդյունքում փաստական տվյալներ են ձեռք բերվել այն մասին, որ նշված ժամանակահատվածում, տարբեր օրերի, ՊԲ N զորամասի մի խումբ պարտադիր ժամկետային զինծառայողներ, ինչպես նաև նրանց ծնողներն ու հարազատները, ովքեր օժանդակել են վերջիններիս կողմից խաբեության եղանակով զինվորական ծառայության պարտականությունները ժամանակավորապես դադարեցնելուն, ինչպես անձամբ, այնպես էլ միջնորդներ՝ ՊԲ զորամասի պարտադիր ժամկետային զինծառայող, սերժանտ Ա. Ա.-ի և նույն զորամասի նախկին պարտադիր ժամկետային զինծառայող՝ Արմավիրի մարզի Պտղունք գյուղի բնակիչ Ս. Գ.-ի միջոցով ՊԲ տվյալ զորամասի շտաբի օպերատիվ բաժնի կառավարման կետերի բաժանմունքի օպերատիվ հերթապահ, մայոր Դ. Ղ.-ին որպես կաշառք տվել են 60000-ականից 75000-ական ՀՀ դրամ գումարներ: Վերջինս, ստանալով խոշոր չափի կաշառք, նշված գումարի դիմաց իր լիազորությունների շրջանակում կատարել է ակնհայտ ապօրինի գործողություններ՝ զորամասին հասցեագրել է իրականությանը չհամապատասխանող հեռախոսագրեր, որոնք հիմք են հանդիսացել մի շարք պարտադիր ժամկետային զինծառայողների արձակուրդ տրամադրելուն՝ հանգեցնելով խաբեության եղանակով վերջիններիս զինվորական ծառայության պարտականությունների կատարումը ժամանակավորապես դադարեցնելուն:
Մայիսի 14-ին ՊԲ զորամասի պարտադիր ժամկետային զինծառայող, սերժանտ Ա. Ա.-ին մեղադրանք է առաջադրվել:
Մայիսի 18-ին ՊԲ N զորամասի շտաբի օպերատիվ բաժնի կառավարման կետերի բաժանմունքի օպերատիվ հերթապահ մայոր Դ.Ղ.-ն ձերբակալվել է:
Նախաքննությունը շարունակվում է, միջոցներ են ձեռնարկվում առերևույթ հանցագործությունների հնարավոր այլ դրվագների բացահայտման ուղղությամբ:
