ԵՐԵՎԱՆ, 17 մայիսի — Sputnik. ԵԱՏՄ–ն ու Իրանն ազատ տնտեսական գոտու մասին ժամանակավոր պայմանագիր են կնքել։ Այս մասին հայտնում է ՌԻԱ Նովոստին։
Եվրասիական տնտեսական հանձնաժողովի ղեկավար Տիգրան Սարգսյանի խոսքով` համաձայնագրի ուժի մեջ մտնելուց անմիջապես հետո կողմերը կարող են տնտեսել մաքսային տուրքերի վճարման ընթացքում։
«Ժամանակավոր համաձայնագիրը վեճերի արդյունավետ լուծման մեխանիզմներ է նախատեսում, այդ թվում` արբիտրաժ։ Կողմերը որոշում են արբիտրերին ու պայմանավորվում են արբիտրաժի վայրի մասին։ Նաև բարձր պաշտոնյաների մակարդակով համատեղ կոմիտեի, բիզնես երկխոսության ստեղծում է նախատեսվում», – հայտնում է ԵՏՀ կոլեգիայի նախագահ Տիգրան Սարգսյանը։
Սարգսյանը պարզաբանել է, որ ժամանակավոր համաձայնագիրը երեք տարով է կնքվում։ Այդ ընթացքում կողմերը պետք է ազատ տնտեսական գոտու լիածավալ համաձայնագրի մասին պայմանավորվածություն ձեռք բերեն։ Համաձայնագրի իրականացումը թույլ կտա զգալիորեն մեծացնել փոխադարձ առևտրի ծավալները, որը նախորդ տարի 2,7 միլիարդ դոլար է կազմել։
2013 թվականի սեպտեմբերի 3–ին ՀՀ այն ժամանակվա նախագահ Սերժ Սարգսյանը հայտնել է Եվրասիական տնտեսական միությանը անդամակցելու ցանկության մասին։ Ներկա պահին ԵԱՏՄ անդամ են Հայաստանը, Ռուսաստանը, Բելառուսը, Ղազախստանն ու Ղրղըզստանը։
