ԵՐԵՎԱՆ, 16 մայիսի– Sputnik. Այսօր բողոքի ակցիա են իրականացնում նաև անհատ տաքսիների վարորդները։ Այս պահին նրանք փակել են Բաղրամյան փողոցը և պահանջում են հավասար պայմաններ ստեղծել անհատ տաքսիստների և տաքսի ծառայությունների միջև` հատկապես ի նկատի ունենալով Յանդեքս ու GG ծառայությունները։
«Ավտովարորդների պաշտպանության լիգա» հասարակական կազմակերպության նախագահ Տիգրան Հովհաննիսյանը, ով ղեկավարում է բողոքի ակցիան, Sputnik Արմենիայի հետ զրույցում ասաց, որ ծառայությունների մեծ մասը գրանցված չեն, իսկ անհատ տաքսիստներից լիցենզիայի վճարում են պահանջում։ «Եթե չես վճարում մեծ թվով տույժ- տուգանք է գալիս։ Շատ անհատ տաքսիստներ վաղուց դադարեցրել են գործունեությունը, բայց օրենքի չիմացության պատճառով չեն տեղեկացրել, ու հիմա միլիոններով պարտքեր են կուտակվել։ Պահանջում ենք չեղարկել այդ անհիմն տուգանքները։ Պահանջում ենք նաև, որ չեղյալ հայտարարեն ամեն անհիմն ճանապարհային խախտումների և կարմիր գծերի համար կուտակված մեծ տուգանքները»,–ասաց Հովհաննիսյանը։
Բողոքները ներկայացնելու նրանք համար պահանջում են համատեղ հանդիպում – քննարկում ՀՀ վարչապետ Նիկոլ Փաշինյանի, ՀՀ Տրանսպորտի, կապի և ՏՏ նախարար Աշոտ Գևորգյանի, Ոստիկանապետի Վալերի Օսիպյանի և ՊԵԿ նախագահի հետ։
Ի դեպ, տաքսիստները ճանապարհը փակեցին այն բանից հետո, երբ Տիգրան Հովհաննիսյանը հեռախոսազրույց ունեցավ Տրանսպորտի նախարարության համապատասխան պաշտոնյայի հետ, ներկայացրեց հանդիպման պահանջը, իսկ վերջինս ասաց, որ իրենց հանդիպմանը պատրաստվելու համար ժամանակ է պետք։
Մեր թղթակցի հաղորդմամբ, ոստիկանությունը այս պահին ցուցարարների նկատմամբ ոչ մի բան չի ձեռնարկում, հսկում է երթևեկությունը և ամեն բան անում են բախումները կանխելու համար։
Ոստիկանության կարգավորմամբ` վերևից իջնող մեքենաները Դեմիրճյանով են շրջանցում փողոցը, որովհետև օպերայից մինչև Բաղրամյան–Դեմիրճյան հատվածը տաքսիստները մեքենաներով փակել են։
