ԵՐԵՎԱՆ, 15 մայիսի — Sputnik. Կառավարության աշխատանքի բացարձակ առաջնահերթությունը կոռուպցիան արմատախիլ անելն է, հայտարարեց Հայաստանի վարչապետ Նիկոլ Փաշինյանը գերատեսչությունների նորանշանակ ղեկավարների հետ հանդիպմանը։
«Ես արդեն խիստ ցուցումներ եմ տվել համապատասխան ատյաններին, բայց, մյուս կողմից, չեմ ուզում, որ կառավարությունում ահաբեկչության մթնոլորտ ստեղծվի», — ասաց նա։
Վարչապետի խոսքով՝ այսօր հասարակության շրջանում դրական տրամադրվածություն է տիրում, և շատ կարևոր է, որ այդ թարմ շունչը փոխանցվի նաև պետական կառավարման համակարգին։
«Շատ կարևոր է, որ մարդիկ հաճույքով գան աշխատանքի և բավարարվածության զգացումով հեռանան։ Դրական տրամադրվածությունն ուղղակիորեն ազդում է մեր աշխատանքի վրա», — նշեց նա։
Այսօր ամբողջ օրը վարչապետը շրջել է նախարարություններով, ներկայացրել գերատեսչությունների նոր ղեկավարներին, քննարկել հիմնական խնդիրները։ Առողջապահության նախարարությունում Փաշինյանն ասել է, որ գերատեսչության առաջ դրված են լուրջ խնդիրներ, որոնց լուծման համար անհրաժեշտ է ներդնել նոր մեխանիզմներ։
«Ակնհայտ է, որ պետպատվերի համակարգը սպառել է իրեն։ Անհրաժեշտ է մեկ քայլ առաջ գնալ և ներմուծել նոր համակարգ այդ խնդրի լուծման համար։ Յուրաքանչյուր հաճախորդ պետք է համապատասխան բուժում ստանա՝ անկախ նրա ֆինանսական հնարավորություններից։ Ընդ որում, մի կողմից մենք չենք կարող ժամանակ կորցնել, մյուս կողմից՝ շատ շտապել նույնպես չի կարելի՝ նոր սխալներ թույլ չտալու համար», — ընդգծել է նա։
Վարչապետի խոսքով՝ ցանկացած ընդունված որոշում պետք է հիմնավորված լինի և միևնույն ժամանակ հասկանալի լինի հասարակությանը, այլապես այն արդյունավետ չի լինի։
«Ցանկացած որոշում ներդնելիս մեզ անհրաժեշտ է հասարակության աջակցությունը։ Մեր կառավարությունը հիմնված է ժողովրդի վստահության վրա, և հենց որ մենք կորցնենք այդ վստահությունը, այլևս անելիք չենք ունենա», — հիշեցրել է Փաշինյանը։
Նա նաև հաջողություն է մաղթել նոր նախարար Արսեն Թորոսյանին և շնորհակալություն հայտնել նախկին նախարար Լևոն Ալթունյանին։
Աշխատանքի և սոցիալական հարցերի նախարարությունում վարչապետը հատուկ ուշադրություն է դարձրել հաշմանդամների իրավունքների պաշտպանությանը, մանկատների գործունեությանը և մանկատների շրջանավարտների իրավունքների պաշտպանությանը։
«Պետք է այդ երեխաներին կրթություն ստանալու հնարավորություն տալ, որպեսզի հետագայում նրանք կարողանան իրենց կյանքը կառուցել դրա հիման վրա», — ասել է նա։
Փաշինյանը նաև նշել է, որ աշխատանքի և սոցիալական հարցերի նախարարությունը միայնակ չի կարող լուծել այդ խնդիրը։
«Իհարկե, այդ խնդիրը կարելի է լուծել միայն ընդհանուր տնտեսական վերելքի դեպքում», — ասել է վարչապետը։
Նա նաև ավելացրել է, որ չնայած լուրջ խնդիրներին ու մարտահրավերներին` վերջին ամիսներին հաջողվել է անել անհնարինը, նշանակում է` նույնիսկ բարդ խնդիրները կարելի է լուծել։
