ԵՐԵՎԱՆ, 15 մայիսի- Sputnik. «Հայաստանում տնտեսական, քաղաքական, անձնական հետապնդումների էջն անվերադարձ փակված է». այսօր հայտարարել է վարչապետ Նիկոլ Փաշինյանը` Տնտեսական զարգացման և ներդրումների նախարարության ղեկավար կազմին նորանշանակ նախարար Արծվիկ Մինասյանին ներկայացնելիս։
Խոսելով երկրի տնտեսության ոլորտում առաջիկա անելիքների մասին` վարչապետը նշել է, որ առկա կարևորագույն խնդիրներից մեկը, որ անհրաժեշտ է լուծել, կապված է ներդրումային միջավայրի հետ։
«Հույս ունեմ, որ մենք արդեն զուտ մթնոլորտի առումով, քաղաքական որոշակի կանոնների հանրահռչակման առումով բավականին խնդիրներ լուծել ենք և ուզում եմ կրկնել, որ Հայաստանում մենաշնորհներ չեն լինելու։ Ես վստահ չեմ, որ այս պահին դեռևս չկան մենաշնորհներ, առնվազն դեֆակտո նրանք գոյություն ունեն, և մենք հետևողականորեն պետք է աշխատենք, որպեսզի դրանք դադարեն գոյություն ունենալ։ Ուզում եմ մի նրբություն ընդգծել․ես չափազանց մեծ գոհունակությամբ եմ արձանագրում, որ տնտեսական դաշտը ադեկվատ է արձագանքում մեր քաղաքական հայտարարություններին»,- նշել է վարչապետը։
Ըստ Փաշինյանի` մայիսի 8-ից հետո, այսինքն նրա վարչապետ ընտրվելուց հետո, ՀՀ տնտեսությունը ոչ միայն նեգատիվ ազդակներ չի ցուցաբերել, այլև դրսևորում է որոշակի դրական միտումներ, ինչը կապված է այն լավատեսական մթնոլորտի և սպասումների հետ, որ գոյություն ունեն բիզնես ոլորտում։
Անդրադառնալով Մինասյանի նշանակմանը, վարչապետը նշել է, որ ուրախ է կառավարությունում համատեղ աշխատանքի հնարավորության համար․«Մենք դեռ խորհրդարանից լավ գիտենք իրար, աշխատել ենք և, կարծում եմ, արդյունավետ համագործակցության որոշակի փորձ ունենք արդեն։ Համոզված եմ, որ ձեր գործունեությունը կլինի արդյունավետ այս կարգավիճակում, որը ձեզ համար նոր չէ»,- ասել է Փաշինյանը։
Նորանշանակ նախարարը, անդրադառնալով վարչապետի մատնանշած խնդիրներին, մասնավորապես հակամենաշնորհային քաղաքականությանը, շեշտել է, որ դրանք լինելու են նախարարության ամենօրյա աշխատանքի հիմքում։
«Մեզ սպասում է լավ առումով թեժ շրջան՝ ամենօրյա դրական փոփոխություններ բերելու տեսանկյունից, և մենք առաջիկայում կներկայացնենք տնտեսական ծրագիրը, որտեղ հեղափոխական մոտեցումներ կլինեն», — նշել է նախարար Մինասյանը` այդ առումով վարչապետից ակնկալելով ամբողջական աջակցություն։
Նիկոլ Փաշինյանը ևս մեկ անգամ ընդգծել է, որ Հայաստանում տնտեսական, քաղաքական, անձնական հետապնդումների էջը անվերադարձ փակված է, բայց մյուս կողմից կա սահման, որը օրինականության ապահովումն է։
Վարչապետը կրկին հիշեցրել է, որ կառավարության բոլոր անդամները պետք է գործեն այն զգացողությամբ, որ ծառայում են Հայաստանի Հանրապետությանը, Հայաստանի քաղաքացիներին և հայ ժողովրդին։
