ԵՐԵՎԱՆ, 15 մայիսի — Sputnik. Արմավիրի մարզի հակակարկտային 4 կայաններից 3-ն աշխատել են, 1-ը տեխնիկական պատճառ չի աշխատել։ Արարատի մարզի Սուրենավան այցելած գյուղատնտեսության փոխնախարար Աշոտ Հարությունյանը Sputnik Արմենիային հայտնեց, որ իրեն խնդիրն այդպես է ներկայացվել։ Փոխնախարարի խոսքով` պատասխանատու աշխատակիցների ոմանք ասել են, թե կայանը չի աշխատել լիցքավորված գազի արտահոսքի պատճառով, մյուսներն էլ ասել են, թե պատճառը եղել է հոսանքի մատակարարման խափանումը։
Թե իրականում ինչու է լռել հակակարկտային կայանը կարկտաբեր ամպերի կուտակման ժամանակ, պետք է պարզի արտակարգ իրավիճակների նախարարությունը։ Իսկ գյուղատնտեսությունը հաշվառում է կարկուտի հետևանքով կրած վնասները։
«Միայն Սուրենավանը չէ, որ տուժել է։ Վերջին օրերի ընթացքում Արմավիրի մարզում տեղացած կարկուտից տարբեր աստիճանի վնասներ են կրել ավելի քան 10 գյուղերի պտղատու այգիներ»,- ասաց փոխնախարարը։
Նախնական հաշվարկով` մարզի 600 հա այգիներից վնասվել է 110-ը։ Գյուղնախարարությունը համայնքային իշխանություններին հանձնարարել է վնասի արձանագրություն կազմել յուրաքանչյուր բնակչի հետ ու ներկայացնել նախարարություն` փոխհատուցման համար կառավարություն դիմելու համար։
Իսկ մինչ այդ Արարատի մարզի Սուրենավան համայնքի բնակիչներն այսօր փակել էին Երևան-Մեղրի միջպետական ավտոճանապարհը։ Նրանց պնդմամբ՝ կարկուտը չէր վնասի բերքը, եթե հակակարկտային կայանները գործեին։ Իսկ դրանց չլիցքավորված լինելու համար իրենք իրենց գյուղապետին են մեղադրում, որն ամեն օր խոստացել, բայց այդպես էլ գազ չի գնել կայանի գործարկման համար։
