ԵՐԵՎԱՆ, 12 մայիսի — Sputnik. Հայաստանի վարչապետ Նիկոլ Փաշինյանը բնակվելու է կառավարական առանձնատանը։ Այդ մասին նա ասել է ֆեյսբուքյան իր էջում` նշելով, որ դա պահանջում է ՀՀ օրենսդրությունը։
«ՀՀ օրենսդրությամբ սահմանված է, որ վարչապետը պետք է ապրի այդ առանձնատանը։ Եթե այդ առանձնատունը դատարկ է մնում, կարող է սիմվոլիզմ լինել, թե ՀՀ-ում վարչապետ չկա»,- ասել է նա։
Փաշինյանի խոսքով` վարչապետի համար նախատեսված պետական առանձնատանն այս պահին բնակվում է Սերժ Սարգսյանը։
Նա նշել է, թե առաջիկայում Սերժ Սարգսյանը կտեղափոխվի այլ տեղ, օրենքով սահմանված կարգով նրան կառաջարկվի այլ առանձնատուն։
«Չգիտեմ ինչ ժամկետում, ես մեկամսյա ժամկետ եմ սահմանել, կտեղափոխվի»,- նշել է վարչապետը՝ արձանագրելով, որ օրենքով հստակ սահմանված է, որ վարչապետը պետք է ապրի այնտեղ։
Փաշինյանը խոստացել է առաջիկա ուղիղ եթերներից մեկը նվիրել կառավարական առանձնատունը ցուցադրելուն։
Նա նշել է, որ մարդիկ պետք է իմանան, թե ինչի համար եք վճարում, որովհետև այդ ամբողջ տարածքը պահվում է պետական բյուջեի հաշվին։
