Այս մասին Sputnik Արմենիայի եթերում ասաց քաղաքագետ Սուրեն Սարգսյանը՝ հավելելով, որ խիստ ուշադրության է արժանացել նոր վարչապետ Նիկոլ Փաշինյանի ցանկությունը՝ Թուրքիայի հետ հարաբերություններ կարգավորել առանց նախապայմանների: Սրան անմիջապես արձագանքել է Թուրքայի վարչապետը:
«Բայց նրա արձագանքի մեջ որոշ ձևակերպումներ լղոզված են. նա ասում է, որ Հայաստանը պետք է հրաժարվի բոլոր պահանջներից, բայց չի հստակեցնում՝ խոսքը նաև Արցախի մասին է, թե՞ ոչ, Ցեղասպանության միջազգային ճանաչումն ի նկատի ունի, թե՞ ոչ: Այսինքն՝ այս հայտարարությունն ավելի շատ հարցեր է առաջացնում, քան պատասխաններ է պարունակում»,-ասում է Սարգսյանը:
Քաղաքագետը հիշեցնում է, որ վերջին 25 տարում Հայաստանի որևէ բարձրաստիճան պաշտոնյա Թուրքիային տարածքային պահանջներ չի ներկայացրել: Այս առումով Յըլդըրըմի հայտարարությունը զարմացնում է:
Հիշեցնենք, որ Թուրքիայի վարչապետ Բինալի Յըլդըրըմն անդրադարձել է Հայաստանի վարչապետ Նիկոլ Փաշինյանի այն հայտարարությանը, թե Հայաստանը պատրաստ է Թուրքիայի հետ առանց նախապայմանների դիվանագիտական հարաբերություններ հաստատել:
«Եթե Հայաստանը Թուրքիայի նկատմամբ տարիներ շարունակ ունեցած թշնամական դիրքորոշումը փոխի, հրաժարվի Թուրքիայի տարածքային ամբողջականության ու սահմանների նկատմամբ ունեցած սխալ դիրքորոշումներից, հրաժարվի այդ ամենից, ցանկանա նոր էջ բացել, մենք էլ ուսումնասիրելով մանրամասները՝ համարժեք պատասխան կտանք: Մենք չենք ցանկանում որևէ մեկի, հատկապես, մեր հարևանների հետ թշնամություն անել: Եթե այդպիսի մոտեցում լինի, բնականաբար մեր պետության շահերի շրջանակներում կքննարկենք այն», — ասել է Յըլդըրըմը։
