ԵՐԵՎԱՆ, 11 մայիսի — Sputnik. Մեծ թվով ներդրողներ սպասում են կառավարության ձևավորմանը։ Այս մասին այսօր լրագրողների հետ հանդիպմանն ասաց Հայաստանի գործատուների միության նախագահ Գագիկ Մակարյանը:
Իրանից, Դոմինիկյան Հանրապետությունից, Եվրոպայից ազգությամբ հայ և օտարազգի բազմաթիվ ներդրողներ միության նախագահին հայտնել են Հայաստանում` արևային էներգետիկայի, սառը թեյերի արտադրության, շինարարության, վերամշակման ոլորտներում ներդրումներ անելու իրենց ծրագրերի մասին։
«Ուղղակի իրենք սպասում են կառավարության ձևավորմանը, քանի որ ցանկանում են տեսնել, թե ում հետ պետք է պայմանավորեն իրենց ծրագրերը։ Բոլորը սպասում էին արհեստական խոչընդոտների վերացմանը, բոլորը ոգևորված են, որ մոնոպոլիաներ չեն լինելու, ավելորդ արհեստական ճնշումներ, ստուգումներ չեն լինելու»,– ասաց Մակարյանը։
Իսկ հայաստանյան հարկային օրենսդրությունը, նրա խոսքով, արտասահմանցի գործարարներին չի մտահոգում։
Ինչ վերաբերում է նոր կառավարությանը, Գագիկ Մակարյանը նոր վարչապետին խորհուրդ է տալիս միայն առաջին դեմքերով չսահմանափակվել։
«Օրինակ` էկոնոմիկայի նախարարությունում փոխնախարարներից մի քանիսը կարող են մնալ, վարչության պետերից 5-6-ը պիտի փոխվեն, Կրթության նախարարությունում տեղակալները պիտի փոխվեն, վարչության պետերը պիտի փոխվեն ու նաև մասնագետների մեծ մասը պիտի փոխվեն»,– ասաց Մակարյանը։
Դիտարկմանը, թե Փաշինյանը խոստացել է կադրային ջարդ չիրականացնել, Մակարյանն արձագանքեց. «Սա կադրային ջարդ չէ, սա կադրային օպտիմալացում է, որովհետև մեր գործադիր իշխանությունում շատ ավելորդ մարդիկ կան։ Մի շարք նախարարություններում իրական աշխատողները 25-30% են, առնվազն 65-70%-ն ավելորդ են։ Պետք է ազատենք, որ ավելորդ փողեր չտանք բյուջեից, գրասենյակային ծախսերը կրճատենք ու բյուրոկրատիան վերացնենք»։
Մայիսի 8-ին ՀՀ վարչապետի պաշտոնը ստանձնած Նիկոլ Փաշինյանը ՀՀ Սահմանադրության համաձայն, մինչև մայիսի 13-ը պետք է ձևավորած լինի կառավարության առնվազն 80%-ը։ Այս պահի դրությամբ 17 նախարարներից ոչ մեկը չի նշանակվել։
