ԵՐԵՎԱՆ, 10 մայիսի — Sputnik. Ռուսաստանաբնակ հայ գործարար Ռուբեն Վարդանյանի հիմնադրած IDeA բարեգործական հիմնադրամը Դիլիջանում 17 մլրդ դրամի ներդրում կանի: Ներդրումային ծրագիրը ներառված է ՀՀ կառավարության ապրիլի 11-ի նիստի օրակարգում։
Ներդրումային ծրագրով նախատեսվում է Դիլիջան քաղաքում կառուցել միջազգային չափանիշներին համապատասխան առողջարանային կենտրոն, որի պետք է խթանի բժշկական զբոսաշրջությունը։
Բացի այդ, ներդրողը մտադիր է բարեկարգել Դիլիջանի քաղաքային լճի հարակից տարածքը, քաղաքային զբոսայգին ու մարզադաշտը։
Խոստացված աշխատանքները նախատեսվում է ավարտել 5 տարում։ Ծրագրի ավարտին Դիլիջանում կբացվի շուրջ 400 աշխատատեղ` 500 000 միջին ամսական աշխատավարձով։
Իսկ մինչ այդ դիլիջանցիները կարող են աշխատել շինարարական ծրագրերում։ Ռուբեն Վարդանյանը խոստանում է 1070 ժամանակավոր աշխատատեղ` առնվազն 200 000 դրամ աշխատավարձով:
Ի դեպ, Դիլիջանի քաղաքապետարանի քաղաքաշինական և ներդրումների խրախուսման խորհուրդը Դիլիջանի առողջարանային կենտրոնի ստեղծման և հասարակական ենթակառուցվածքների զարգացման ծրագրի նախագիծը հաստատել է 1.5 տարի առաջ` 2017թ. հունվարին։
