ԵՐԵՎԱՆ, 10 մայիսի – Sputnik. Հայաստանի ոստիկանության պետ կդառնա Երևանի ոստիկանության պետի տեղակալ Վալերի Օսիպյանը։ Այս մասին ֆեյսբուքյան իր էջում հայտնեց ՀՀ վարչապետ Նիկոլ Փաշինյանը։
Նա նշեց, որ այդ որոշումը խորհրդանշական է։ «Բողոքի ակցիաների ժամանակ ես և Վալերի Օսիպյանը, մենք և Օսիպյանը գտնվում էինք բարիկադների երկու կողմերում։ Որոշեցի, որ այս որոշումից հետո բոլորս նույն կողմում հայտնվենք։ Լավ սիմվոլ է, որ փշալարերի կուլտուրան Հայաստանից վերացնենք»,- նշեց Փաշինյանը։
Նիկոլ Փաշինյանի խոսքով` ոստիկանությունից է կախված Հայաստանի իրավակարգը, օրինականությունը, քաղաքացու ինքնազգացողությունը։
«ՀՀ քաղաքացիները պետք է իրենց զգան վստահ, պաշտպանված, և որևէ բան չպիտի սպառնա այդ զգացողությանը»,– ասաց Փաշինյանը։
Նշենք, որ այսօր Վլադիմիր Գասպարյանն ազատվել է ՀՀ ոստիկանապետի պաշտոնից։
