ԵՐԵՎԱՆ, 8 մայիսի — Sputnik. Մայիսի 8-ին Վելիկայա Բելօզյորկա գյուղում տեղի ունեցավ XX դարի 40-ականներին Զապորոժիեի մարզի ազատագրման համար իրենց կյանքը զոհաբերած 37 զինվորների վերահուղարկավորումը։ Վերահուղարկավորվեց նաև Հայրենական մեծ պատերազմի հայ հերոս Դավիթ Տեր-Պողոսյանի աճյունը, որն ավելի վաղ գտել էին Զապորոժիեի մարզում։ Նա երկար ժամանակ անհետ կորած էր համարվում։
«Այսօր Հայ առաքելական եկեղեցու վանահայր Հուսիկի հետ մասնակցեցինք Վելիկայա Բելօզյորկա գյուղում տեղի ունեցած Զապորոժիեի մարզի ազատագրման համար իրենց կյանքը զոհաբերած Երկրորդ աշխարհամարտի 37 հերոսների աճյունների վերահուղարկավորմանը։ Որոնողների կողմից հայտնաբերված աճյունների մեջ հայտնաբերվել են նաև մեր հայրենակից Դավիթ Տեր-Պողոսյանի (մինչ այդ անհետ կորած էր համարվում) աճյունը», — Facebook-ի իր էջում գրել է Զապորոժիեի հասարակական գործիչ Ռուդոլֆ Հակոբյանը։
Նա նշել է, որ հայ զինվորի գումարտակը շրջափակման մեջ էր հայտնվել, և հերոսական մարտում բոլորը զոհվել էին։ Աճյունի հետ գտած փաստաթղթերում նաև հայերենով գրված չուղարկված նամակ կար, որը հասցեագրված էր հերոսի ընտանիքին։
Հակոբյանի խոսքով` Ուկրաինայի հայերի միության ներկայացուցիչները երկար տարիներ Հայաստանում իրենց կապերի և Ուկրաինայում հայկական դեսպանատան միջոցով փորձել են գտնել Դավիթ Տեր-Պողոսյանի հարազատներին և բարեկամներին, սակայն ապարդյուն։ Այդ պատճառով որոշում էր կայացվել Հերոսի մարմինը հուղարկավորել այն հողում, որի համար նա զոհել էր իր կյանքը։
