ԵՐԵՎԱՆ, 8 մայիսի — Sputnik. Նիկոլ Փաշինյանի նախագահությամբ կառավարության առաջին նիստը կգումարվի առաջիկա հինգշաբթի` մայիսի 10-ին։ Այս մասին հայտնում է ՀՀ կառավարության մամուլի ծառայությունը։
Հրապարակված օրակարգի համաձայն` կառավարությունը պատրաստվում է փոփոխություններ կատարել «Եվրասիական տնտեսական միության մասին» 2014 թվականի մայիսի 29-ի պայմանագրում։
Նախագծի հիմնավորումից պարզ է դառնում, որ փոփոխությունը պայմանավորված է ՀՀ նոր կառավարման համակարգի անցումով։ Բանն այն է, որ ԵԱՏՄ պայմանագրի համաձայն` Եվրասիական տնտեսական բարձրագույն խորհրդի կազմի մեջ մտնում են անդամ պետությունների ղեկավարները։ Եթե կառավարման նախկին համակարգով Հայաստանի ղեկավարը նախագահն էր, ապա 2015թ.-ին ընդունված նոր Սահմանադրությամբ` վարչապետը։
Պայմանագրում առաջարկվող փոփոխությամբ նախատեսվում է նախագահին վերաբերող դրույթը փոխարինել վարչապետով։
Այսինքն` փոփոխության ընդունումից ու ԱԺ-ի կողմից վավերացնելուց հետո ԵԱՏՄ երկրների ղեկավարների հանդիպումներում Հայաստանը կներկայացնի արդեն նորանշանակ վարչապետ Նիկոլ Փաշինյանը։
Մեկ այլ որոշմամբ կառավարությունն առաջարկում է ստեղծել «Ռազմատեխնիկական գիտահետազոտական ինստիտուտ» ՊՈԱԿ։
Նախագիծը մշակվել է ներկա ռազմաքաղաքական իրավիճակը հաշվի առնելով, սեփական զինված ուժերի կարիքները բավարարող ժամանակակից ռազմական արդյունաբերություն ունենալու նպատակով։
Կազմակերպության ստեղծման նախագիծը մշակել ու ներկայացրել է ՀՀ պաշտպանության նախարարությունը։ Այն գործելու է նախարարության ֆինանսավորմամբ։
