ԵՐԵՎԱՆ, 8 մայիսի — Sputnik. Հավաքական անվտանգության պայմանագրի կազմակերպության գլխավոր քարտուղար Յուրի Խաչատուրովը շնորհավորել է Նիկոլ Փաշինյանին վարչապետի պաշտոնում ընտրվելու կապակցությամբ։
«Ընդունեք իմ անկեղծ շնորհավորանքները Հայաստանի Հանրապետության վարչապետի պաշտոնում ընտրվելու կապակցությամբ»,- նշել է նա։
Խաչատուրովը վստահ է, որ Փաշինյանի քաղաքական փորձը և համաժողովրդական աջակցությունը թույլ կտա կառավարությանը կարճ ժամանակում իրականացնել հայտարարված բարեփոխումները, որի արդյունքը կդառնա Հայաստանի համակողմանի զարգացման հզոր թռիչքը, միջազգային հարթակում նրա դիրքերի հետագա ամրապնդումը։
«Այսպիսի ստեղծագործ գործունեության հաջողության երաշխիքը հայ ժողովրդի միասնությունն ու բարձր համախմբվածությունն է, նրա պատրաստակամությունը ակտիվորեն ներգրավվել մեր երկրի արդիականացման աշխատանքին»,- ասել է Խաչատուրովը։
Նա նշել է, որ Հայաստանի Հանրապետությունը Հավաքական անվտանգության պայմանագրի կազմակերպության առավել ակտիվ անդամներից է, մշտապես համակ ուշադրություն է դարձրել նրա գործունեության կատարելագործման անհրաժեշտությանը՝ միաժամանակ առաջ քաշելով կարևոր նախաձեռնություններ՝ ուղղված անվտանգության ապահովմանը, այդ թվում՝ Կովկասյան տարածաշրջանի հավաքական անվտանգության առումով։
«Ակնկալում եմ ՀԱՊԿ ամրապնդման գործում ինտենսիվ համագործակցության շարունակում, նրա առջև կանգնած խնդիրների լուծում՝ կազմակերպության բոլոր անդամ պետությունների շահերը հաշվի առնելով։ Այս հիշարժան օրվա առթիվ, հարգելի Նիկոլ Փաշինյան, ընդունեք իմ լավագույն բարեմաղթանքները, քաջ առողջություն, բարեկեցություն և մեծ հաջողություններ Ձեզ այս պատասխանատու պաշտոնում»,- ասել է Խաչատուրովը։
