ԵՐԵՎԱՆ, 8 մայիսի — Sputnik. Ընդդիմադիր առաջնորդ Նիկոլ Փաշինյանի ընտրությունը Հայաստանի վարչապետի պաշտոնում առիթ է դարձել Երևանի կենտրոնում համաժողովրդական տոնի համար։
Ասում են, թե միայն Հայաստանում կարելի է տեսնել ցուցարարների, որոնք փողոցներում խորոված են պատրաստում, նաև` երեխաներին գրկած երիտասարդ մայրիկների, որոնք ցույցերի ժամանակ հանգիստ զբոսնում են ոստիկանների մոտ։
«Տրամադրությունը հիանալի է, բարձր։ Մենք առավոտյան 10-ից այստեղ ենք», — ասացին Ամիրյան փողոցով զբոսնող ընկերուհիները։
Երկրի ապագան պայծառ է տեսնում աղջիկներից մեկը։ Նա հույս ունի, որ Նիկոլ Փաշինյանին կհաջողվի երկրում ինչ-որ բան փոխել դեպի լավը։
Քաղաքի կենտրոնում ուրախանում է ոչ միայն երիտասարդությունը։ Հանրապետության հրապարակ են եկել ընտանիքներով և նույնիսկ կոլեկտիվներով՝ Նիկոլ Փաշինյանին աջակցելու համար։
«Մեզ հիանալի ենք զգում։ Մենք ուղղակի չենք միացել այս շարժմանը։ Պայքարում ենք հանուն արդարության, տարիներով սպասել ենք այս օրվան», — խոստովանեց մի ակտիվիստ, որն աշխատում է էլեկտրոնիկայի խանութում։
Նա հավելեց, որ հայ ժողովուրդը վաղուց այսպես չէր ուրախացել։ Փաշինյանի հաղթանակով ոգևորված մարդկանց շարքում էր մի երիտասարդ մայրիկ՝ իր երեխաների հետ։ Նա կենտրոնական հրապարակ էր բերել իր վեց ամսական դստերն ու ուրախանում էր ցնծացող ժողովրդին նայելիս։
Ցանկանում եմ, որպեսզի իմ երեխաներն իրենց ապագան կապեն հայրենիքի հետ, այլ ոչ թե հավերժ ապրեն ճամպրուկների վրա, խոստովանեց Sputnik Արմենիայի զրուցակիցը։
Ռուս-հայկական (Սլավոնական) համալսարանի ուսանողուհիները հույս հայտնեցին, որ Նիկոլ Փաշինյանի ընտրությամբ երկրում տեղի կունենան դրական փոփոխություններ, իսկ գործազրկության պատճառով երկիրը լքած մարդիկ կկարողանան վերադառնալ հայրենիք։
Փողոց էին դուրս եկել ոչ միայն երևանցիները։ Մայրաքաղաք էին եկել Հայաստանի տարբեր քաղաքներից և նույնիսկ հեռավոր գյուղերից։ Նրանք շրջում են ազգային դրոշներով, թմբուկներով, երգում ու պարում կենտրոնական հրապարակում։
Հիշեցնենք, որ խորհրդարանի այսօրվա նիստում Փաշինյանը 59 կողմ և 42 դեմ ձայներով ընտրվեց վարչապետ։ Նրա թեկնածությանն աջակցեցին «Ելք», «Ծառուկյան» և ՀՅԴ դաշինքները։ Խորհրդարանական մեծամասնություն կազմող ՀՀԿ-ն հայտարարել էր, որ Փաշինյանին կտա ընտրվելու համար անհրաժեշտ նվազագույն ձայները, բայց սատարում է նրան միայն երկրում կայունության համար։
