ԵՐԵՎԱՆ, 8 մայիսի — Sputnik. Կրեմլում համարում են, որ Միխայիլ Լեոնտևն անհաջող արտահայտություններ է արել Հայաստանի քաղաքական իրավիճակի վերաբերյալ։ Այս մասին հայտնել է ՌԴ նախագահի մամուլի քարտուղար Դմիտրի Պեսկովը։
Նա ընդգծել է` այդ խոսքերը ոչ մի ընդհանրություն չունեն Ռուսաստանի պաշտոնական դիրքորոշման հետ ։
«Դրանք նաև ոչ մի ընդհանուր բան չունեն ու չեն կարող ունենալ հայ ժողովրդի բարեկամության ու եղբայրության ջերմ զգացմունքների հետ», —ասել է Պեսկովը։
Նա համարում է, որ այդ անհաջող ու անշնորհք խոսքերին պետք չէ ուշադրություն դարձնել։
Հիշեցնենք՝ ապրիլի 26-ին ու մայիսի 3-ին «Ռոստնեֆտի» փոխտնօրեն, քաղաքական վերլուծաբան Միխայիլ Լեոնտևն ու հաղորդավար Միխայիլ Յուրևը չափազանց տգեղ կերպով անդրադարձել էին Հայաստանում տեղի ունեցող իրադարձություններին «Կոմսոմոլսկայա պրավդա» ռադիոկայանի եթերում։ Ռուսաստանի հայերի միությունը արձագանքել է հնչած վիրավորանքներին ու դիմել ՌԴ Գլխավոր դատախազություն, մասնավորապես այն պատճառով, որ գնահատականները վերաբերում էին ոչ միայն բողոքի շարժմանը, այլ ընդհանրապես Հայաստանին ու հայերին։
