ԵՐԵՎԱՆ, 7 մայիսի — Sputnik. Մայիսի 6–ին Լիբանանում անցկացված խորհրդարանական ընտրություններում առաջադրված հայ պատգամավորի թեկնածուներից 3-ն անցել են խորհրդարան։ Այս մասին տեղեկացնում է Բեյրութի հայկական «Ազդակ» պարբերականը։
Հայազգի թեկնածուներից 4–ին առաջադրել էր Հայ Յեղափոխական Դաշնակցությունը (ՀՅԴ)։ Նրանցից ընտրություններում հաղթանակ են գրանցել Հակոբ Բագրատունին, Ալեքսանդր Մաթոսյանն ու Հակոբ Թերզյանը։ Սերժ Չուխատարյանը չի անցել խորհրդարան։
ՀՅԴ Բեյրութի գրասենյակն արդեն իր գոհունակությունն է հայտնել ընտրությունների վերաբերյալ։
Ընտրություններն, ընդհանուր առմամբ, անցել են խաղաղ մթնոլորտում։ Անվտանգության հետ կապված խախտումներ են գրանցվել որոշ շրջաններում։
Ըստ «Ազդակի»՝ ընտրական գործընթացի վրա էապես ազդել է ընտրակաշառքը կամ քաղաքական նպատակներով գումարների բաժանումը։
Ավելի վաղ Լիբանանի «Ազդակ» հայկական թերթի գլխավոր խմբագիր Շահան Գանտահարյանը Sputnik Արմենիայի հետ զրույցում ասել էր, որ Լիբանանի խորհրդարանական ընտրություններում ներկայացված են հայազգի ութ թեկնածու։Լիբանանի խորհրդարանում կա 128 տեղ, որոնց համար պայքարում էին ավելի քան 10 կուսակցություն։ Լիբանանի հայ համայնքը ուներ վեց պատգամավորական մանդատ։ «Դաշնակցություն» կուսակցությունն առաջադրել է չորս թեկնածու, «Ռամկավար Ազատական» կուսակցությունը՝ երեք, իսկ «Հնչակյանը»՝ մեկ։
