ԵՐԵՎԱՆ, 7 մայիսի — Sputnik. 2018թ-ին Փհենչհանի օլիմպիական խաղերի արծաթե մեդալակիր Եվգենյա Մեդվեդևան պատմել է, որ կշարունակի ելույթ ունենալ Ռուսաստանի հավաքականի կազմում։ Այս մասին նշված է Ռուսաստանի գեղասահքի ֆեդերացիայի կայքում։
Հիշեցնենք, որ ավելի վաղ ԶԼՄ-ներում տեղեկություն էր տարածվել, որ հայտնի մարզիկը կարող է տեղափոխվել Հայաստանի հավաքական։
«Ես կշարունակեմ հանդես գալ Ռուսաստանի Դաշնության դրոշի ներքո` մնալով «Սամբո 70» դպրոցում` միաժամանակ մարզվելով կանադացի մասնագետ Բրայան Օրսերի մոտ։ Ես դա անում եմ, որպեսզի օգտագործեմ մարզական գործընթացի նոր հնարավորությունները և այլ մեթոդները, շարունակեմ Ռուսաստանը ներկայացնել ամենաբարձր մակարդակում», — նշել է գեղասահորդուհին։
Մարզուհու խոսքով` վերջին նորությունն այն է, որ հիմա նրա մարզիչն է դարձել Բրայան Օրսերը։ Մեդվեդևան նշել է, որ չի ցանկանում մանրամասնել, թե ինչպես է հեռացել Տուտբերիձեից։
Բացի այդ, նա շնորհակալություն է հայտնել նախկին մարզչին։
«Ամենից առաջ շնորհակալություն եմ հայտնում Էթերի Տուտբերիձեին և ամբողջ մարզչական շտաբին երկար, արդյունավետ, երբեմն շատ բարդ աշխատանքի համար։ Հսկայական համբերության համար, որը նրանք դրսևորել են իմ հանդեպ և անհավանական մարզչական, պրոֆեսիոնալ դիմացկունության համար», — ասել է Մեդվեդևան։
Նրա խոսքով` այդ մարդիկ կյանք են տվել իրեն գեղասահքում և հասցրել նման բարձր արդյունքների ։
Մեդվեդևան պատմել է, որ օլիմպիադայից հետո մարտի 8-ին մեկնել է Գերմանիա` բժշկական հետազոտություն անցնելու համար։ Նրան խորհուրդ են տվել զերծ մնալ ծանրաբեռնվածությունից, և նա ստիպված է եղել երկու ամիս բաց թողնել լիարժեք մարզումները։
Ավելի վաղ հայտնի է դարձել, որ Եվգենյա Մեդվեդևան հեռացել է Էթերի Տուտբերիձեից։ Միաժամանակ մարզիչը նույնպես չի կարողացել կապ հաստատել իր սանի հետ, նա չի պատասխանել զանգերին և հաղորդագրություններին։ Դրա հետ կապված` տեղեկատվություն է հայտնվել այն մասին, որ Մեդվեդևան ցանկանում է փոխել քաղաքացիությունը և հանդես գալ Հայաստանի հավաքականի կազմում։
