ԵՐԵՎԱՆ, 7 մայիսի — Sputnik. Չինաստանի բնակչուհի Լի Լիցզյունը, որն ամբողջ աշխարհին հայտնի է որպես 118 երեխա որդեգրած կին, կարող է հանցագործ լինել։ Այս մասին հայտնում է ՌԻԱ Նովոստին` հղում անելով չինական ԶԼՄ–ներին։
Լի Լիցզյունը, որն իրեն միլիոնատեր էր անվանում, 1996 թվականից սկսել է երեխաներ որդեգրել և 2007 թվականին հիմնել է «Սիրո գյուղ» անունը կրող մասնավոր մանկատունը։ ԶԼՄ–ները հայտնում են, որ կինը 118 երեխա է որդեգրել։ Լրատվամիջոցներն ակտիվորեն լուսաբանում էին նրա գործունեությունն, ինչի շնորհիվ նա հայտնի դարձավ ամբողջ երկրում։
Global Times թերթը գրում է, որ ոստիկանության հայտարարության համաձայն` հայտնի դառնալով, մանկատան տիրուհին բարեգործությունը սկսեց օգտագործել սեփական հարստացման համար, մեծ գումարներ ստացավ բյուջեից և բարերարներից։ Ոստիկանությունը հայտնել է, որ նա կասկածվում է որդեգրած երեխաներին օգտագործելու մեջ` չինովնիկներին սպառնալու և վախեցնելու համար։
Ինչպես հաղորդում են ԶԼՄ–ները` կինը 70 հազար յուան է պահանջել մի ընկերությունից, որը պետք է մալուխ անցկացներ մանկատան վրայով, ինչպես նաև մոտ 300 յուան հյուրանոցից և հոսպիտալից։
Իշխանությունների հայտարարությունների համաձայն` մանկատան երեխաներից ոմանք իրականում ծնողներ ունեն։ Նրանց անունները մանկատունն օգտագործում էր իշխանություններին խաբելու և պետությունից սուբսիդիաներ ստանալու համար։
Իշխանությունները մանկատնից 74 երեխա են տարել հաստատությունը (որը ամենամյա պարտադիր ստուգումը չի անցել) փակելու վերաբերյալ որոշում կայացնելուց հետո։
Կնոջը կասկածում են մի շարք հանցագործությունների կատարման, այդ թվում` շանտաժի և հասարակական կարգը խախտելու մեջ։ Ոստիկանությունը կնոջ բանկային հաշվին ավելի քան 20 մլն յուան (3.1 մլն դոլար) և ավելի քան 20 հազար դոլար է սառեցրել։ Իշխանությունները նաև պարզել են, որ նրան մի շարք անշարժ գույք և ճոխ ավտոմեքենաներ են պատկանում։
Բացի այդ, հաղորդում է ստացվել այն մասին, որ մանկատանը կարող էին առևանգված երեխաներ լինել։ Ոստիկանությունը երեխաներից արյան նմուշներ ու մատնահետքեր է վերցրել` կորածների տվյալների բազայում ստուգում անցկացնելու համար։
