ԵՐԵՎԱՆ, 7 մայիսի — Sputnik. Հայաստանում ազգային համաձայնության կառավարությունը երկար չի աշխատի, և դա լիովին օրինաչափ է։ Այդ մասին Sputnik Արմենիային ասաց քաղաքագետ Երվանդ Բոզոյանը։
Ինչպես հայտնի է, Հայաստանի վարչապետի ընտրության հաջորդ քվեարկությունը տեղի կունենա մայիսի 8-ին։ Միակ թեկնածուն բողոքի շարժման առաջնորդ, «Ելք» խմբակցության ղեկավար Նիկոլ Փաշինյանն է։
Ընդդիմադիրը և նրա կողմնակիցները բազմիցս հայտարարել են, որ նոր կառավարությունն ազգային համաձայնության կառավարություն կլինի։ Եվ թեև առայժմ չի խոսվում կոնկրետ գործող անձանց մասին, տեսականորեն նոր կառավարությունը կազմված կլինի «Ելքից», «Ծառուկյան» դաշինքից և ՀՅԴ-ից, այսինքն նրանցից, ովքեր ամենասկզբից աջակցել են Փաշինյանի թեկնածությանը։
Բոզոյանի կարծիքով` անցումային այս փուլում ազգային համաձայնության կառավարության ձևավորումն անխուսափելի է, որովհետև ընդդիմության առաջադրած օրենսդրական նախաձեռնությունները պահանջում են բոլոր քաղաքական ուժերի համախմբում։ Խոսելով կառավարության հնարավոր կազմի և այն մասին, թե կարող են արդյոք դրանում ընդգրկվել ներկա կառավարության դեմքեր, փորձագետը հիշեցրեց, որ Փաշինյանը հնարավոր և անհրաժեշտ է համարում Հանրապետական կուսակցության առանձին ներկայացուցիչներին ներառելը։
«Վերջինները, սակայն, շարունակում են դիմադրել, և առայժմ բարդ է ասել, թե արդյունքում ինչ պատկեր է կստացվի։ Պարզ է մի բան, որ նոր կառավարությունը կստեղծվի քվեարկության պատկերի հիման վրա», — հավելեց նա։
Բոզոյանը նշեց, որ որոշ հանրապետականներ կողմ կքվեարկեն Փաշինյանի վարչապետությանը, բայց նրանք կլինեն ոչ թե հանրապետական քաղաքական գործիչները, այլ ավելի շուտ գործարար հանրության ներկայացուցիչները։ Նրա կարծիքով` արդյունքում կառավարությունը կազմված կլինի նշված երեք քաղաքական ուժերից և ՀՀԿ մեկ-երկու ներկայացուցիչներից։
Բոզոյանի կարծիքով` նման կառավարությունները սովորաբար երկար չեն աշխատում։ Նրանց հիմնական առաքելությունը ոչ սովորական քաղաքական իրավիճակներից դուրս գալու ուղիներ որոնելն է, փողոցի սպասումներին համապատասխան փոփոխություններ կատարելը։ Հետագայում կանցկացվեն արտահերթ ընտրություններ, որոնք կարտացոլեն հասարակության տրամադրությունները և քաղաքական օբյեկտիվ իրավիճակը։
