ԵՐԵՎԱՆ, 5 մայիսի — Sputnik. Հայաստանի վարչապետի պաշտոնակատար Կարեն Կարապետյանը կարող է մնալ մեծ քաղաքականության մեջ միայն Հանրապետական կուսակցությունից դուրս գալու դեպքում, Sputnik Արմենիային ասաց քաղաքագետ Երվանդ Բոզոյանը։ Բոլորը Հայաստանում հասկանում էին, որ գործող իշխանությունն այլևս չի կարող այսպես աշխատել, որ փոփոխություններ են պետք։ Փորձագետի խոսքով` մարդիկ սպասում էին, որ Սերժ Սարգսյանը երկրորդ ժամկետից հետո վերջապես կհեռանա։
«Վերջին պահին նա փորձեց վերարտադրել իր իշխանությունը։ Եվ թեև նա խոստացավ, որ չի դառնա վարչապետ, եթե Սահմանադրությունը փոխվի, բայց մարդիկ տեսան, թե նա ինչպես խաբեց բոլորին։ Դա դարձավ վերջին կաթիլը։ Ինչ-որ մեկը պետք է ասեր, որ «թագավորը մերկ է», այդ մարդը եղավ Նիկոլ Փաշինյանը», — ասաց Բոզոյանը։
Գործադուլներից և բողոքի ակցիաներից հետո իշխանությունների համար պարզ դարձավ, որ անիմաստ է դիմակայել ժողովրդին, դրա համար ռեսուրսներ չկան, և նրանք պետք է փոխզիջման գնան։ Բոզոյանի կարծիքով՝ շարժման առաջնորդը կարող էր լինել ոչ թե Փաշինյանը, այլ մեկ ուրիշը։ Այստեղ դեր ունեցավ նաև պատահականության գործոնը։
Քաղաքագետը նշում է, որ դեռ 2016թ-ին նոր կառավարության նշանակումից հետո Կարեն Կարապետյանի հետ կապված որոշակի սպասումներ կային։ Բայց երբ պարզ դարձավ, որ Սարգսյանը նրան երկրորդ է պլան մղում, մարդիկ պարզապես դուրս եկան փողոց։
Ի տարբերություն ՀՀԿ վերնախավի՝ Սարգսյանի առաջադրումից առաջ Կարապետյանը վարկաբեկված չէր, նա վատ մենեջեր չէր, դրական էր ընդունվել Երևանի քաղաքապետ եղած ժամանակ։
«Եթե Կարապետյանին հաջողվեր հասնել նրան, որ Սարգսյանը չառաջադրվի վարչապետի պաշտոնում, ապա իրավիճակն այլ կլիներ։ Տարբեր հարցումները ցույց են տվել, որ 2017թ-ին նա բավականին բարձր վարկանիշ է ունեցել։ Բայց նա հերքեց քաղաքական գործիքակազմը և զբաղվեց զուտ մենեջերի գործունեությամբ», — ասաց Բոզոյանը։
Սարգսյանի առաջադրումը վարկաբեկեց Կարապետյանին, համարեցին, որ նա թույլ մարդ է, որը չկարողացավ հաղթել նախկին նախագահին։
Քաղաքագետը չի բացառում, որ եթե Կարապետյանը դուրս գա ՀՀԿ-ից և հանդես գա բացատրություններով և ներողություններով, ապա գուցեև քաղաքական ապագա ունենա։
