ԵՐԵՎԱՆ, 4 մայիսի — Sputnik. ՀՀ վարչապետի թեկնածու Նիկոլ Փաշինյանը ֆեյսբուքյան իր էջի միջոցով խոսել է մայիսի 8-ին սպասվելիք ընտրության կանխատեսելի վարկածների մասին և կոչ հղել իր հետևորդներին։
«Քաղաքական հայտարարությունների մակարդակով գիտենք, որ մեզ սատարող հայտարարություններ արվել են, բայց մինչև իրականությունը չարձանագրվի, չենք կարող որևէ վերջնական բան ասել, թե ինչ կլինի։ Դրա համար բոլորս պիտի լինենք պատրաստ, որովհետև օրվա ցանկացած պահի կարող է պարզվել, որ իրավիճակ է փոխվել։ Այդ պարագայում մենք պետք է կրկնակի եռակի ծավալներով իրականացնենք մեր բողոքի ակացիաները, որպեսզի հասնենք վերջնական հաղթանակի»,-ասել է Փաշինյանը։
Նա նշել է, որ մամուլում կան հրապարակումներ, որ տարբեր ուժեր հակահեղափոխություն են պատրաստում, այդ բոլոր լուրերը ստուգվում են, որ ցանկացած իրավիճակի պատրաստ լինեն։
«Չի բացառվում, որ մայիսի 8-ին պետք լինի փակել բոլոր ճանապարհները։ Պարզ է` դժվար կլինի հանձնել այս կոռումպացված իշխանությունը։ Մենք պետք է զգոն լինենք և կարողանանք շատ արագ գործել` մեր որդեգրած սկզբունքների շրջանակում»,-ասել է վարչապետի թեկնածուն և հավելել, որ ոչ բռնի, թավշյա հեղափոխությունը հաղթել է, որովհետև հայ ժողովրդի 80-90 տոկոսը այդ հեղափոխության կողմնակիցն է։
Նիկոլ Փաշինյանն իր կողմնակիցներին խորհուրդ է տվել չտրվել սադրանքների և հիշել, որ մեր պայքարը բռնի չէ։
Նա նաև հիշեցրել է, որ մայիսի 8-ին բոլորը գալիս են սպիտակ վերնաշապիկներով, որ հաղթանակը դառնա խաղաղության ու բարության հաղթանակ։ Վերջում ընդդիմության առաջնորդը շնորհակալություն է հայտնել նամակների, անհանգստությունների համար։
Հիշեցնենք, որ Հայաստանում բողոքի զանգվածային ցույցերը սկսվել էին ապրիլի 13-ին, մարդիկ փողոց էին դուրս եկել` պահանջելով նախկին նախագահ, վարչապետ Սերժ Սարգսյանի հրաժարականը։ Ապրիլի 23-ին Սարգսյանը հրաժարական տվեց։
Մայիսի 1-ից հետո, երբ խորհրդարանն ընդդիմադիր առաջնորդ Նիկոլ Փաշինյանին չընտրեց նոր վարչապետ, Փաշինյանը կոչ արեց համընդհանուր գործադուլ և դասադուլ անել։ Մայիսի 2-ին ընդդիմության կողմնակիցները փակեցին հիմնական ու երկրորդական ավտոճանապարհները, որից հետո իշխող կուսակցությունը որոշում կայացրեց աջակցել ժողովրդի թեկնածուին։ Վարչապետի նոր ընտրությունները տեղի են ունենալու մայիսի 8-ին։
