ԵՐԵՎԱՆ, 3 մայիսի — Sputnik. Հայաստանի Հանրապետական կուսակցության հույսերը` պահպանել թեկուզ ինչ-որ իշխանություն, կապված են արտահերթ խորհրդարանական ընտրությունների հնարավոր հետաձգման հետ։ Sputnik Արմենիային նման կարծիք հայտնեց քաղաքական տեխնոլոգ Վիգեն Հակոբյանը։
Մայիսի 2-ին ՀՀԿ խմբակցության ղեկավար Վահրամ Բաղդասարյանը հայտարարեց, որ խմբակցությունը թեկնածու չի առաջադրի և կաջակցի նրան, ում կառաջադրի պատգամավորների մեկ երրորդը։ Փաշինյանին սատարելու մասին հայտարարել են «Ելք», «Ծառուկյան» և ՀՅԴ խմբակցությունները։
«Հանրապետական կուսակցության հայտարարությունը նշանակում է, որ եթե մոտակա չորս-հինգ օրվա ընթացքում ֆորսմաժորային իրադարձություններ չլինեն, նրանք չեն խոչընդոտի վարչապետի ընտրությանը, նաև միասնական կքվեարկեն Նիկոլ Փաշինյանի օգտին։ Բայց վերջին օրերի դինամիկան ցույց է տալիս, որ առավոտյան մի բան է հայտարարվել, երեկոյան` մեկ այլ բան, ընդ որում` բոլոր կողմերից, ոչ միայն ՀՀԿ-ի։ Այնպես որ, ոչ մի սցենար բացառված չէ», — ասաց Հակոբյանը։
Քաղտեխնոլոգի կարծիքով` ՀՀԿ-ի կողմից որոշման վերանայումը չի դառնա իրավիճակի լուծում, քանի որ մայիսի 2-ի իրադարձությունները ցույց տվեցին, որ երկրում իրական իշխանություն ունի Նիկոլ Փաշինյանը։
Ընդդիմադիր պատգամավորին հաջողվել է կաթվածահար անել ամբողջ երկիրը։ Եթե նախկինում կարելի էր խոսել այն մասին, որ երկրում երկիշխանություն է, ապա մայիսի 2-ին արդեն այդ մասին չի խոսվել, մնացել է միայն Փաշինյանը։
«Այսօր պաշտոնական իշխանությունն այլևս ռեսուրսներ չունի, այդ թվում` ուժային` իրավիճակի մեջ բեկում մտցնելու համար», — ասաց Հակոբյանը։
Բացի այդ, ՀՀԿ-ի որոշման վրա ազդել է նաև այն, որ ներկա իրավիճակում, ի տարբերություն մայիսի 1-ի, Փաշինյանը` որպես երեք քաղաքական ուժերի թեկնածու, իր վրա որոշակի պատասխանատվություն է վերցնում։
Դեռ մայիսի 1-ի ընտրության ժամանակ բավականին քողարկված այսպիսի միտք էր հնչում, որ քաղաքական պատասխանատվություն կրողն անհայտ է, այսինքն` Նիկոլ Փաշինյանը միայն աջակցողներ ուներ, իսկ նրանց հետ կոալիցիա չէր կազմել։
«Հիմա ՀՀԿ-ում ինչ-որ առումով փաստում են, որ Փաշինյանը «Դաշնակցության», «Ելքի» և «Ծառուկյան» դաշինքի թեկնածուն է։ Դրանով հանրապետականներն ակնարկում են, թե ով է այս պահի դրությամբ Փաշինյանի հենարանը և ով է պատասխանատու լինելու ապագայում այդ թեկնածուի համար», — ասաց ՀակոբյանըԼ
Նախկինում Փաշինյանն առաջադրված էր «Ելքի» կողմից և մյուս ուժերի աջակցությունը չէր ենթադրում քաղաքական պատասխանատվություն, հիմա իրավիճակն այլ է և ապագայում ժամանակավոր կառավարության աշխատանքի ընթացքում այդ գործոնը կարող է խաղալ իր դերը։
Մյուս կողմից, դեռ մինչև նախորդ քվեարկությունը խորհրդարանում հանրապետականները փորձել են հասկանալ, թե նրանք ինչ երաշխիքներ կունենան Փաշինյանի ընտրվելու դեպքում։
«Փաշինյանն ուղիղ ասել է, որ ամեն ինչ կարող է հետո քննարկվել` քվեարկությունից հետո։ Հանրապետականները որոշել են ցույց տալ, որ նրանք կարող են հանդես գալ որպես միասնական ամբողջություն, որ իրենց ռեսուրսը դեռ կարող են պահպանել», — ասաց Հակոբյանը։
Դրան ի պատասխան` Փաշինյանը ցույց է տվել, որ կարող է վատացնել իրավիճակը երկրում, մայիսի 2-ին պարզ է դարձել, որ իշխանությունը նրա ձեռքում է։ Նա կարծում է, որ ՀՀԿ-ն և Փաշինյանն ամեն դեպքում հանգել են որոշակի հայտարարի։
Հակոբյանի կարծիքով` ՀՀԿ-ն կարող է հույս ունենալ, որ եթե խորհրդարանական ընտրությունները տեղի ունենան ոչ թե առաջիկայում, ապա մի քանի ամիսների ընթացքում Փաշինյանի վարկանիշը կարող է ընկնել։
«Շարժման առաջնորդներն արդեն հայտարարում են, որ իշխանափոխությունից հետո միամտություն է տնտեսության ոլորտում հրաշքի սպասելը։ Նրանք հասկանում են, որ բնակչության կողմից նման սպասումներով իշխանության անցնելը վտանգավոր է», — ասաց Հակոբյանը։
Նա կարծում է, որ ամենակարևոր հարցը հենց ընտրությունների անցկացման ժամկետն է։ Փաշինյանը մի քանի անգամ նշել է, որ դրանք պետք է լինեն խելամիտ ժամկետներ, բայց հասկանալի չէ, թե դրանք իրենցից ինչ են ներկայացնում։
Բացառված չէ, որ դա կտևի մինչև մեկ տարի, և այդ շրջանը բավական բարդ կլինի Փաշինյանի համար։ Պատճառը ՀՀԿ-ի` մեծամասնությունը պահպանելու մեջ է, մյուս կողմից` այսպես կոչված կոալիցիայի ոչ միանշանակ լինելը։
Որպես գործնական և փորձառու գործիչ` Փաշինյանը հասկանում է այդ ամենը։ Ուստի նրա առջև կդրվի կրկնակի նպատակ` ընթացիկ հարցերի լուծման հետ մեկտեղ անցկացնել համեմատաբար արդար ընտրություններ, որոնց արդյունքները նրա համար ընդունելի կլինեն։
