ԵՐԵՎԱՆ, 2 մայիսի — Sputnik. Երևանի մետրոյի կայարանների մուտքերը դեռ փակ են, բայց մետրոյի աշխատակիցները գործադուլ չեն հայտարարել։ Այդ մասին Sputnik Արմենիայի թղթակցի հետ զրույցում ասաց մետրոպոլիտենի տնօրեն Փայլակ Յայլոյանը։
Ավելի վաղ որոշ ԶԼՄ-ներում տեղեկություն էր հայտնվել, որ Մետրոպոլիտենի աշխատակիցները մայիսի 2-ին միացել են համատարած գործադուլին։
«Դա չի համապատասխանում իրականությանը։ Գործադուլ չի եղել», — հայտարարեց Յայլոյանը։
Նշենք, որ մայիսի 1-ին «Ելք» խմբակցության ղեկավար, բողոքի շարժման առաջնորդ Նիկոլ Փաշինյանը կոչ արեց փակել օդանավակայանն ու բոլոր փողոցները և տոտալ դասադուլ ու գործադուլ անել։
Փաշինյանը նման կոչ արեց այն բանից հետո, երբ Հայաստանի Հանրապետական կուսակցությունը «դեմ» քվեարկեց վարչապետի պաշտոնում նրա ընտրության ժամանակ։
