ԵՐԵՎԱՆ, 2 մայիսի — Sputnik. Հանրապետության նախագահ Արմեն Սարգսյանը մայիսի 2-ից խորհրդակցություններ է սկսել Ազգային Ժողովի խմբակցությունների ղեկավարների հետ՝ երկրում ստեղծված իրավիճակը քննարկելու և լուծումներ գտնելու նպատակով: Այս մասին տեղեկացնում է ՀՀ նախագահի մամուլի ծառայությունը։
«Երեկ Ազգային ժողովը չկարողացավ ընտրել երկրի վարչապետ: Խորապես ցավում եմ, որ քաղաքական ճգնաժամը շարունակվում է, չնայած այն բանին, որ բոլորն էլ հայտարարում են երկրի ապագայի համար դրա վտանգավորության մասին»,- ասված է ՀՀ նախագահի հայտարարության մեջ։
Սարգսյանն արձանագրում է, որ բոլորի ուշադրությունը սևեռված է քաղաքական ուժերի գործողությունների վրա և կոչ է անում առաջիկա շաբաթվա ընթացքում շարունակել խորհրդակցությունները ճգնաժամից ելք գտնելու ուղղությամբ, ինչը կնպաստի ազգային շահերին:
