ԵՐԵՎԱՆ, 1 մայիսի — Sputnik. Մեր ազգային ամենամեծ մտավախությունը եղել է ԼՂ հակամարտության կարգավորման հարցում մեզ որևէ լուծում պարտադրելը։ Այս պրոցեսների արդյունքում մենք մի քայլ արդեն արել ենք նման լուծումը կանխելու համար։ Նման զարգացումներ թույլ չտալու կարևոր կետը ազգային միասնությունն ու զարթոնքն է, որն այսօր կա։
Այս մասին ԱԺ–ում ընթացող պատգամավորներ – վարչապետի թեկնածու հարց ու պատասխանի ժամանակ` պատասխանելով «Ծառուկյան» դաշինքի պատգամավոր Տիգրան Ուրիխանյանի` ԼՂ խնդրի վերաբերյալ ձեր պատկերացրած լուծումների մասին հարցին, ասաց վարչապետի թեկնածու Նիկոլ Փաշինյանը։
«Այն պայմաններում, երբ Ադրբեջանի ղեկավարությունը որևէ պատեհ առիթ բաց չի թողնում սպառնալ հայ ժողովրդին, Արցախի ժողովրդին և նույնիսկ սպառնում է Երևանը գրավել, բանակցությունները ձևական բնույթ են կրում, դրանք բանակցություններ են բանակցությունների համար։ Այդ բանակցություններն իրական իմաստ կստանան միայն այն պայամններում, երբ Ադրբեջանն ուղերձ հղի միջազգային հանրությանը, որ ինքը պարտավորվում է ճանաչել միջազգային իրավունքի նորմերը և պատրաստ է խնդրի կարգավորմանը այդ նորմերի շրջանակում»,–ասաց Նիկոլ Փաշինյանը և կոչ արեց ԵԱՀԿ ՄԽ համանախագահ երկրներին, օգտագործելով իրենց լծակները, անհապաղ Ադրբեջանին հետ պահեն ռազմաշունչ հռետորաբանություն կիրառելուց։
Վարչապետի թեկնածուի խոսքով` քանի դեռ այս հռետորաբանությունը կա, մենք պիտի համախմբենք մեր ուժերը այդ ագրեսիայի դեմն առնելու համար։
Հանրապետական խմբակցության պատգամավոր Արման Սաղաթելյանն էլ մեջբերեց սոցցանցերում շրջանառվող մի տեքստ, ըստ որի՝ Նիկոլ Փաշինյանը տարիներ առաջ խնդրի ԼՂ հարցով տեսակետ էր հրապարակել «Հայկական ժամանակ» թերթում` գրելով, որ իրեն զարմացնում է, որ երկրում դեռ կան մարդիկ ովքեր պատրանքներ ունեն «գրավյալ, օկուպացված» տարածքների նկատմամբ:
Սաղաթելյանը նշեց, թե արդյո՞ք հակասություններ չկան Փաշինյանի նախկին և ներկա տեսակետների միջև չկա:
Նիկոլ Փաշինյանն ասաց, որ այդ մեջբերումը արդեն 5 տարի է իր լուսանկարով շրջանառության մեջ է դրված սոցցանցերում, և ինքը բազմիցս հերքել է, ցույց է տվել թերթի հիշյալ համարը, որտեղ նման տեքստ գոյություն չունի:
«Այդ դեպքում ինչպես է Փաշինյանը պատկերացնում փոխզիջումը, եթե մտադիր են երկիրը բանակցային գործընթացում ներկայացնել»,–հաջորդեց Սաղաթելյանի հարցը:
«Հստակ ասել ենք, որ փոխզիջման մասին խոսելը նման մթնոլորտում, երբ սպառնում են հայկական պետականությունը վերացնել, անիմաստ է: Այս պայմաններում կարող ենք խոսել միայն սեփական երկրի պաշտպանունակությունը բարձրացնելու մասին: Իսկ փոխզիջման մասին կարող ենք խոսել, երբ Ալիևը հստակ ուղերձ հղի, որ պատրաստ է ճանաչել ԼՂՀ ժողովրդի իրավունքը»,–պատասխանեց վարչապետի թեկնածուն։
