ԵՐԵՎԱՆ, 1 մայիսի — Sputnik. ԱԺ-ում տարբեր խմբակցությունների պատգամավորների ելույթներից հետո Նիկոլ Փաշինյանը հայտարարեց, որ ՀՀԿ-ն այսօրվա քննարկումներով ինքն իրեն ոչնչացրեց միանգամից ու անշրջելիորեն:
«Զարմանալի է, որ ՀՀԿ ներկայացուցիչները գոյություն չունեցող իշխանության տեսիլքը պահպանելու համար անցան հակապետական հռետորիկային՝ մեր շարժումը աշխարհաքաղաքական թելադրանք որակելով»,- ասաց Փաշինյանը՝ համոզմունք հայտնելով, որ դա ոչ միայն թշնամանք է սերմանում բարեկամ ժողովուրդների միջև, այլև վիրավորանք է հայ ժողովրդի նկատմամբ, քանի որ ժողովրդական պայքարը վերագրվում է ինչ-որ մութ ուժերի:
«Հայաստանում կա ժողովուրդ մի կողմից և հանրապետական վերնախավ մյուս կողմից, ովքեր ձգտում են պահպանել իրենց իշխանությունը»,- ասաց նա:
Դիմելով ՀՀԿ պատգամավորներին` Նիկոլ Փաշինյանն ասաց, որ նրանց ինքնաոչնչացման քայլերը հասել են անդառնալի սահմանին, բայց կոչ արենց իրենց քվեարկությամբ չհատել այդ սահմանը:
Նա պահանջեց, հորդորեց անցումային ժամանակավոր կառավարություն ձևավորել, որը պատրաստ է անմիջապես սկսել խորհրդակցությունների շարք` անցումային շրջանի խնդիրների լուծմանը ձեռնամուխ լինելու համար: Փաշինյանը դարձյալ հայտարարեց, որ իր ընտրվելու դեպքում կադրային ջարդ, վենդետա չի լինելու, քանի որ շարժման ընթացքում փակվել է այդ էջը:
