ԵՐԵՎԱՆ, 1 մայիսի — Sputnik. Բաքվում ամենայն լրջությամբ կարծում են, որ Հայաստանի քաղաքական իրավիճակը կապակայունանա, ու հիմա փորձում են տարբեր արտակարգ իրավիճակներ սադրել արցախյան հակամարտության գոտում։ Այս մասին Sputnik Արմենիայի հետ զրույցում ասաց քաղաքագետ, «Նորավանք» գիտակրթական հիմնադրամի գործադիր տնօրեն Գագիկ Հարությունյանը։
Նշենք, որ Ադրբեջանի խորհրդարանում կոչ են արել Հայաստանում տիրող իրավիճակի հետ կապված արտակարգ նիստ գումարել։ Միլի Մեջլիսի պատգամավոր Հուդրաթ Հասանգուլիևը հայտարարել է, որ Հայաստանի ներքաղաքական իրավիճակը կարող է վերածվել քաղաքացիական պատերազմի, ու «սադրիչները կարող են խախտել հրադադարի ռեժիմը»։
«Ադրբեջանի արձագանքը բնական է։ Նրանք հույս ունեն, որ իրավիճակը կապակայունանա։ Սակայն կարծում եմ, որ այսօր Ազգային ժողովի քվեարկությամբ հնարավոր կլինի թուլացնել լարվածությունը», — ասաց Հարությունյանը։
Նրա խոսքով` Ադրբեջանն առաջին անգամ չէ, որ փաստերը գլխիվայր շրջում է։ Կենտրոնացնելով խոշոր ուժերը հակամարտության գոտում` Բաքուն խոսում է «Հայաստանի կողմից հնարավոր սադրանքների մասին»։
Հարությունյանի կարծիքով` հարևան երկրում միայն ուրախ կլինեին, որ իրավիճակը Հայաստանում անկայուն լինի։
«Որոշ ադրբեջանական վերլուծաբաններ դեռ մեկ-երկու ամիս առաջ ասում էին, որ Ադրբեջանը 90-ականներին պարտություն կրեց ներքին անկայունության պատճառով։ Հետևաբար պետք է հասնել նրան, որ Հայաստանում էլ նույն իրավիճակը տիրի։ Սակայն հույս ունեմ, որ այդպես չի լինի», — ընդգծեց փորձագետը։
Հիշեցնենք` Արցախի պաշտպանության նախարարությունն այսօր հայտնել է, որ ապրիլի 30-ից սկսած` առաջնագծում կրկին նկատվել են հակառակորդի զինտեխնիկայի և կենդանի ուժի կուտակումներ ու տեղաշարժեր, որոնք շարունակվել են նաև այսօր։
