ԵՐԵՎԱՆ, 30 ապրիլի – Sputnik. Մենք չենք գալիս կադրային ջարդ անելու, ձերոնքականներին մերոնքականներով փոխարինելու։ Ապագա կառավարության կազմի մասին հարցին ի պատասխան հայտարարեց Նիկոլ Փաշինյանը ՀՀԿ խմբակցության հետ հանդիպման ժամանակ։
«Կառավարություն կազմելով չի հայտարարվելու կողմերից մեկի հաղթանակն ու մյուսի պարտությունը»,- ասաց նա։
Փաշինյանն ապագա կառավարության անդամների անուններ չնշեց՝ հիշեցնելով, որ Սահմանադրությունը կառավարության կազմավորում նախատեսում է վարչապետի ընտրությունից ու նշանակումից հետո, ոչ թե հակառակը։
Այդուհանդերձ, նա չբացառեց, որ նոր գործադիր մարմնում կլինեն նաև քաղաքական այլ ուժերի ներկայացուցիչներ։
«Կառավարությունը կձևավորվի քաղաքական երկխոսության արդյունքում։ Մենք պետք է ընտրենք այն քաղաքական հենարանը, որի հետ պետք է այս ֆորսմաժորային իրավիճակում կառավարություն ձևավորենք»,- ասաց Փաշինյանը։
Իսկ այդ գործընթացի քաղաքական պատասխանատվությունը, նրա խոսքով, կրում է համաժողովրդական շարժումն ու անձամբ ինքը։
