ԵՐԵՎԱՆ, 30 ապրիլի — Sputnik. Անվտանգությունն ինձ համար առաջնային խնդիր է։ Այս մասին այսօր ՀՀ ԱԺ–ում լրագրողների հետ զրույցում ասաց «Ելք» խմբակցության ղեկավար, ՀՀ վարչապետի թեկնածու Նիկոլ Փաշինյանը։
«Վարչապետ լինելու դեպքում իմ առաջին քայլը կլինի անվտանգության խնդիրներին անդրադառնալը։ Ես իմ դիրքորոշումը ԼՂ բանակցությունների շուրջ բազմիցս եմ արտահայտել, և դա չի փոխվել։ Ես լիարժեք սատարում եմ Արցախի իշխանություններին։ Ադրբեջանի այս ոչ կառուցողական և ագրեսիվ դիրքորոշման պայմաններում մեր հիմնական խնդիրն է հետևողականորեն ուժեղացնել մեր բանակը, բարձրացնել մարտունակությունը»,–ասաց Փաշինյանը և հավելեց, որ այս ժողովրդական զարթոնքը բարձրացնում է Հայաստանի անվտանգությունը և միջազգային հարթակներում նրա վարկանիշը։
Պատասխանելով Sputnik Արմենիայի` ով է փոխարինելու Սերժ Սարգսյանին բանակցային սեղանի շուրջ հարցին, Նիկոլ Փաշինյանն ասաց, որ այս պահին չունի այդ հարցի պատասխանը, որովհետև ինքը դեռ վարչապետի թեկնածու է, ոչ վարչապետ։
Հիշեցնենք, որ Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Հետո «Իմ քայլը» նախաձեռնությունը պայքարում էր, որ իշխող ՀՀԿ–ն չառաջադրի վարչապետի իր թեկնածուին։ Ապրիլի 25–ից նրանք կրկին բողոքի ակցիաներ ու հանրահավաքներ են անցկացնում ոչ միայն Երևանում, նաև` ՀՀ այլ քաղաքներում։ Նիկոլ Փաշինյանն այս պահին ՀՀ վարչապետի միակ թեկնածուն է։
Ընտրությունները ՀՀ ԱԺ–ում կանցկացվեն մայիսի 1–ին։ Ապրիլի 28–ին Հայաստանի Հանրապետական կուսակցությունը հայտնել է, որ իր թեկնածուին չի առաջադրի։ «Ծառուկյան» դաշինքն ու Դաշնակցությունը նշել են, որ կաջակցեն «ժողովրդի թեկնածուին»։
