ԵՐԵՎԱՆ, 30 ապրիլի — Sputnik. Լոռու մարզի Դսեղ գյուղի բնակիչներից մեկը երեկ՝ ապրիլի 29-ին, ինքնասպանություն է գործել։ Այս մասին հայտնում է shamshyan.com-ը։
Ժամը 19։00-ի սահմաններում Դսեղի գյուղապետ Գառնիկ Հովսեփյանը ոստիկանության Թումանյանի բաժնին հայտնել է, որ գյուղի բնակիչը իրենց տան սենյակում կախվել է։
Ոստիկանները պարզել են, որ տղամարդը ՌԴ քաղաքացի, 46 տարեկան Արսեն Ղ.-ն է։
Ոստիկաններն ու քննիչները նրա տանը հայտնաբերել են երկտող, որտեղ գրված է եղել. «Հագուստներիս ձեռք մի տվեք, ես հոգնել եմ կյանքից, ձեզ մնաք բարով եմ ասում, հարազատներ։ Եղբայրս, ներող կլինես քո ախպորից, ով ճիշտ քայլեր չարեց, ինձ կթաղեք հորս կողքին»։
Երկտողն առգրավվել է, դատաբժշկի նախնական եզրակացության համաձայն՝ դիակի վրա արտաքին զննությամբ բռնության հետքեր չեն հայտնաբերվել։
Ըստ տեղեկությունների՝ տղամարդուն հայտնաբերել է նրա ազգականուհին։
